Batuhan mikiha kang Abellanosa sa MalacañANg

CEBU, Philippines -  Pormal nga gisang-at ni manlalaban Aristotle Batuhan  sa buhatan ni Presidente Benigno Aquino III ang reklamong administratiba batok  ni  Rodrigo “Bebot” Abellanosa sa dakbayan  sa Sugbo   uban  sa panghinaot  nga  masuspenso kini.

Nagkanayon si Batuhan nga hilabihan  ra kaabusado nga pagka-konsehal si Abellanosa  kay gipaburot pag-ayo  niini   ang iyang Asian College of Technology pinaagi  sa pagsuyop  sa  mga  scholar  nga  gigastohan  sa kagamhanan  sa dakbayan sa Sugbo.

Sumala pa ni Batuhan nga tataw kaayo nga napahimuslan   ni Abellanosa  ang  iyang  pagka-membro  sa scholarship committee sa konseho sa dakbayan sa Sugbo  aron  masipong niya  ang  kuwarta  sa kagamhanan alang  sa mga scholar.

Sayo  niini gisumbong  na  ni Philip Banguiran  kining  kaso ni Abellanosa  ngadto  sa Ombudsman Visayas  sa miaging  tuig.

Apan   gipatin-aw ni  Batuhan  nga wala siya’y kalabotan sa reklamo nga giatubang ni Abellanosa sa Ombudsman  ug iyang  gipasabot    nga managsama sila si Banguiran og        baruganan.

Si Batuhan  ug Abellanosa  maoy mag-atbang  sa pagka-kongresista  sa habagatang  distrito  sa dakbayan  sa Sugbo  sa  umaabot   nga election sa Mayo.

Sa bahin  ni  Abellanosa  kini  nagkanayon  nga usa  ka  yanong  pamolitika  ang  gihimo  ni  Batuhan  batok kaniya. (WC)(BANAT NEWS)