Mga establisamento nga Maapektohan sa sunog gitinguha’ng tabangan
CEBU, Philippines — Posible nga makadawat og tabang pinansiyal gikan sa kagamhanan sa Dakbayan sa Sugbo ang mga negosyo nga naapektohan sa sunog ubos sa ordinansahon nga gisang-at ni Konsehal Alvin Arcilla.
Tumong sa ordinansahon nga matabangan ang mga establisemento nga makabangon human sa sunog ilabina kadtong kanunay nga nagbayad sa ilang buhis ngadto sa kagamhanan.
Ubos sa ordinansahon, mahimong kwalipikado sa tabang pinansiyal ang mga negosyo kon 50 porsyento sa ilang mga pasilidad ang nangaguba tungod sa sunog.
Kinahanglan usab nga adunay sertipikasyon gikan sa Bureau of Fire Protection (BFP) nga nagpamatuod sa kadaot nga nahitabo sa establisamento.
Ang kinatibuk-ang kantidad sa business tax nga nabayaran sa negosyo ngadto sa kagamhanan sulod sa lima ka tuig sa wala pa mahitabo ang sunog mao usab ang kantidad sa tabang pinansiyal nga madawat.
Pasabot niini, magdepende ang kantidad sa tabang pinansiyal sa record sa gibayrang buhis sa matag establisamento.
Ang pundo alang sa maong ayuda kuhaon gikan sa calamity fund ubos sa Local Disaster Risk Reduction and Management Fund (LDRRMF).
Ang mga negosyo nga gustong makadawat sa ayuda kinahanglang mosumite sa ilang aplikasyon ngadto sa Cebu City Treasurer’s Office (CTO) sulod sa tulo ka buwan sukad nahitabo ang sunog.
Kinahanglang ipakita ang mga dokumento nga magpamatuod sa ilang gibayara’ng business tax sulod sa lima ka tuig.
Kinahanglan usab nga ipakita ang dokumento nga magpatuod nga gipanag-iya niini ang negosyo ug sertipikasyon gikan sa BFP nga nadaot ang negosyo tungod sa sunog.
Tipik sa ordinansahon, gidasig sa mga negosyante nga responsable nga mobayad sa ilang buhis aron mahatagan usab kini og proteksiyon sa kagamhanan kon maapektohan sa sunog.
Ang maong ordinansahon giduso pa ngadto sa Committee on Laws and Styling ug sa Committee on Budget and Finance. (BANAT NEWS)
- Latest















