Tanker nawad-a'g brake, 4 sakyanan giungad

CEBU, Philippines – Nabalian sa iyang tiil ang usa ka lalaki human malatayi sa ligid sa Isuzu tanker nga nawad-an og brake ug midumbol og upat ka mga sakyanan alas-10 pasado ang takna sa buntag sa eskina sa dalan Basak ug barangay Canduman sa dakbayan sa Mandaue.

Ang biktima mao si Sixto Cabardo, 51, taga sitio Dunggoan sa barangay Basak sa nahisgutang dakbayan samtang ang nakadasmag mao si Felix Briones, 36, taga barangay Malolos sa lungsod sa Barili.

Si PO2 Junrey Fuentes sa traffic division sa Mandaue City Police Office (MCPO) nga nahinabi sa Banat News miingon nga ang tanker gikan sa lungsod sa Consolacion.

Dugang pa niya nga namatikdan sa drayber nga dili na mopaak ang iyang brake sa dihang naabot sa maong dapit hinungdan nga nadumbolan niini ang awto nga gimaneho ni Allan Duenas, 36, taga Danlag sa lungsod sa Consolacion.

Wala pa gyud kini mohunong, sunod nga giungad niini ang duha ka multicab nga gimaneho nila ni Mario Gulvan nga taga Peace Valley sa barangay Lahug sa dakbayan sa Sugbo ug ni Rense Sales, 26, taga Guizo sa dakbayan sa Mandaue.

Nalahos pa gyud og kaigo ang pasaheroang gimaneho ni Neceporo Andrino nga taga Dona Rosario Village sa barangay Basak sa maong dakbayan.

Si Fuentes miingon nga naglikay-likay na unta si Briones apan naatlan usab nga mitabok si Cabardo hinungdan nga naabtan kini ug natumba dayon naligsan sa tiil, human niini nadasok ang trak diha sa daplin ug wala na makaabante pa.

Ang biktima daling gidala sa Mandaue City District Hospital apan gibalhin sa Vicente Sotto Memorial Medical Center sa dakbayan sa Sugbo samtang mitahan sa iyang kaugalingon ngadto sa kapolisan si Briones.(BANATNEWS)