Raymundo nanawagan nga ipadayon ang dungog sa “Cebu’s Finest”
CEBU, Philippines — Si Police Brigadier General Rogelio Raymundo, Jr., acting director sa Police Regional Office (PRO)- 7 nanawagan sa mga sakop sa Cebu City Police Office (CCPO) nga ipadayon ang dungog sa “Cebu’s Finest” pinaagi sa disiplina, integridad, propesyonalismo ug matinud-anong pagserbisyo ngadto sa publiko.
Gipadayag ni Raymundo ang iyang panawagan atol sa iyang opisyal nga pagbisita sa CCPO kagahapon.
Kauban niya sa pagbisita ang iyang Command Group nga sila si Police Brigadier General Isagani Fetizanan, deputy regional director for administration ug Police Colonel Arnel Apud, deputy regional director for operations lakip ang mga sakop sa regional staff.
Mainitong giabi-abi si Raymundo sa mga personnel sa CCPO ug gihatagan og arrival honors.
Human sa seremoniyas, iyang gisusi ang mga patrol vehicle, Internal Security Operations (ISO) equipment, police security equipment ug mga armas nga gigamit sa nagkalainlaing police station, Tourist Police Unit, Tactical Motorcycle Riding Unit (TMRU) ug City Mobile Force Company.
Ang maong mga kagamitan gitumong sa pagpalig-on sa operational readiness, pagpaayo sa kapasidad sa pag-deploy sa mga polis ug pagdugang sa police visibility sa tibuok siyudad.
Sa iyang pakigpulong, gipadayag ni Raymundo ang iyang kalipay nga personal nga nahimamat ang mga personnel sa CCPO ug nahinumdom sa iyang unang mga tuig sa Philippine National Police (PNP) niadtong 1995 diin nailhan ang Cebu City nga malinawon ug hapsay nga mga komunidad.
Gihinumduman niya kon giunsa pagkab-ot sa CCPO ang dungog nga “Cebu’s Finest” nga iyang giila nga resulta sa disiplina, kadasig, determinasyon ug dedikasyon sa mga polis bisan pa sa mga hagit nga ilang giatubang.
“Simple lang ang gusto nilang mangyari noon: matapos ang araw, makapagpahinga at makapag-report kay Sto. Niño na, ‘I have done my part for the day.’ That is why they were called Cebu’s Finest”, matud ni Raymundo diha sa gi-post nga mensahe sa ilang Facebook page.
Si Raymundo nagkanayon nga ang mga polis kinahanglang mahimong ehemplo sa pagsunod ug pagpatuman sa balaod ug dili matapos ang ilang responsibilidad kon wala na sila sa duty.
Ang mga polis nga maoy nagpatuman sa balaod kinahanglan sila mismo maoy unang mosunod niini.
Gipasidan-an niya ang mga personnel nga samtang miyembro sila sa PNP obligado gihapon sila’ng motuman sa Police Operational Procedures ug PNP Code of Ethical Standards. (BANAT NEWS)
- Latest















