Simpolang ug park 'n go abante sa semis

CEBU, Philippines - Miabante ngadto sa semifinals ang Simpolang Barbekyuhan ug ang Park ‘N Go Bakeshop human ilang gipalagpot ang tagsa-tagsa nila ka kaatbang atol sa nagpadayong 2nd F. Llamas Youth Association (FYA) basketball tournament kaniadtong Huwebes didto sa Vicente Sotto Memorial Gym sa barangay Punta Princesa, ning dakbayan.

Ang Simpolang kinsa maoy third seed human sa elimination round, mipukan sa Angelica sa iskor, 98-90 ug maoy makigsangka batok sa no. 2 qualifier Heartfelt sa usa ka knockout game karong Martes sa gabii.

Sa laing duwa, midaog ang fourth-seed Park ‘N Go Bakeshop aron palagputon ang no. 5 Kharos human sa ilang 89-85 nga kadaogan aron maoy makigtakos batok sa topseed Viking Haulers sa usa gihapon ka knockout match.

Parehong mi-abante dayon ngadto sa semifinals ang Viking ug ang Heartfelt isip top two qualifiers.

Ang modaug karong Martes moabante dayon sa finals diin magtakos sab sila sa usa ka laing knockout match.

Sila si Nico Laborte ug Poloy Aglipa parehong mibahug og 18 puntos aron pangulohan ang Simpolang samtang si Noel Medalle ug Butoy Tabares midubang og 17 ug 16 puntos matag usa ug mitampo sab si Ryan Villaver ug 14 puntos.

Si Paul Basalo maoy nangu sa Angelica sa iyang 23 puntos ug laing upat ka kauban pareho sab mi-iskor og double figures susama sa gihimo sa Simpolang.

Sa laing bahin, si Carl Rama mi-antug ug night-high 31 puntos samtang si Dexter Caballero mikadlit og 26 puntos alang sa Park ‘N Go dihang ilang gisungag ang Kharos nga usa sa labing gika-intapang contender apan nagkapandol-pandol sila sa naghinapos nga duwa sa elimination.

Ang presensiya ni Chirssar Llegunas maoy nakapalig-on sa Kharos tungod kay siya maoy scoring leader sa team ug kanunay siyang consistent. Si Llegunas mihipos og 29 puntos ug si Markreb Arias midugang og 18 puntos.

Ang Angelica ug ang Kharoz mitipon na sa CRV ug sa Lauron & Rolly nga sayong mibakasayon. Ang CRV ug Lauron & Rolly wala moabante ngadto sa playoffs tungod kay sila maoy nahimong no. 7 ug no. 8 seed human sa elimination round.  (BANATSPORTS)