Lower Ramos naka-eskapo
CEBU, Philippines – Naka-eskapo ang Lower Ramos bitbit ang 78-77 nga kadaugan batok sa Sta. Teresita A sa pagsugod sa Jun Pe Inter-Sitio Fiesta Cup didto sa Benjamin Solon Memorial Gym sa Barangay Cogon-Ramos, ning siyudad.
Si Dodot Edano Jr. mipabuto og 22 puntos, samtang ang managsuong Aringuin nga sila si Edward ug Emong nagkumboya og 26 alang sa labing unang daog sa Lower Ramos.
Ang naparot nga Sta. Teresita gipangulohan ni George Sambolan, kinsa mikulit og 36 puntos ug si P. Hera midunol og 13 puntos.
Ang lay-up ni Edaño sa nahabiling 3.2 segundos sa final period maoy niluwas sa Lower Ramos gikan sa mga kamot sa Sta. Teresita, kinsa nag-ung-ong na unta sa ganghaan sa kadaugan dihang nilabaw kini og uno punto, 77-76.
Sa laing duwa, ang Sta.Teresita B nidaog human ilang gipaluhod ang Ramos Proper sa iskor nga 70-65.
Sila si J. Kyamko ug C. Tan maoy nangulo sa Sta.Teresita B nga nagkumboya og 27 puntos, samtang ang pilderong Ramos Proper gipangulohan ni Kokiy Robi nga miduslit og 21 puntos.
Puntos Matag Usa
Unang duwa:
Lower Ramos (78) - E.Edaño 22, Ed. Aringuin 16, Em. Aranguin 10, A. Rodriguez 10, R. Edaño 10, Abayhon 3, T. Rodriguez 5, Alfafara 2.
Sta. Teresita A (77)- Sambolan 36, P.Hera 13, S. Hera 9, Gunido 9, Tujan 7, Abellana 2, Mendoza 1
Ikaduhang duwa:
Sta. Teresita B (70) – J. Kyamko 14, Tan 13, Cabelon 16, Ares 10, Tecson 7, R. Kyamco 5, C .Kyamco 2, Saliego 2, Gallardo 1
Ramos Proper (65) –Rubi 21, Solon 14, Cuyos 10, Donaire 9, Yap 4, Olasiman 3, Otorto 3 – BANAT NEWS
- Latest
- Trending