Alberto's Pizza, Explorer daog

CEBU, Philippines – Gilampurnas sa Alberto's Pizza ug Team Explorer ang ilang tagsa-tagsa ka kaatbang sa pagsugod sa 5th Lucky Tableware Regulars Basketball Tournament didto sa Visayan Glass Gym sa barangay Guadalupe, ning siyudad.

Ang Alberto's Pizza milubong sa Visayan Ballers sa iskor nga 78-56, samtang ang Explorer milubong sab sa CDU Reapers sa iskor nga 47-29.

Ang Alberto's Pizza mirehistro og 19-9 sa unang kuwarter ug mitubo pa kini ngadto sa 18 puntos sa halftime sa iskor nga 40-22 nga nakapaluya sa Visayan Ballers.

Sa laing bahin, ang Explorer   walay puas nga mipabuhagay sa nagpungasi nga opensiba sa final half aron pagpupo og daog.

Ang Explorer miabante og tres puntos sa halftime, 23-20, apan kalit kining nanginit sa ikatulong kuwarter aron pagposte og 13 puntos nga bentaha dayon na sa pagkab-ot sa kadaugan.

Lima ka teams ang nisalmot sa tinuig nga kompetisyon. Ang mga partisipanteng koponan mosubay og double round robin format sa elimination round.

Ang top four moabante sa crossover semis diin ang top seed makigsangka batok sa fourth-ranked squad ug ang no. 2 makighamag sa no. 3. Ang mga mananaog maoy magsangka sa tinaktakay nga kampiyonato. – BANAT NEWS