Balik-balik nga power plant shutdown paimbestigahan

CEBU, Philippines — Nanawagan ang Cebu Electricity Rights Advocates (CERA) og congressional investigation sa balik-balik nga paghunong sa mga power plant ug komprehensibong pagsusi sa transmission infrastructure sa nasod samtang nagpadayon ang yellow ug red alerts sa Cebu ug sa tibuok Visayas.

Sumala sa National Grid Corporation of the Philippines (NGCP), hapit 73 ka sunod-sunod nga adlaw nga nakasinati ang Visayas grid og yellow ug red alerts.

Sa advisory sa NGCP kagahapon, Sept. 9, 2026, ang available capacity sa Visayas grid anaa sa 2,567 megawatts (MW), kumpara sa peak demand nga 2,493 MW.

Kapin 700 MW sa generating capacity ang dili magamit tungod sa mga power plant nga naka-forced outage o nag-operate sa mas ubos nga kapasidad o derated capacity.

Matud ni Nathaniel Chua, lead convenor sa CERA, nagpakita ang padayong mga outage sa kapakyasan sa power generation ug transmission.

Ang mga bag-ong outage nakapawala sa importanteng baseload capacity sa grid, samtang balik-balik nga gihisgutan sa NGCP ang pagkadili magamit sa dagkong coal-fired power plant, lakip ang Therma Visayas Inc. (TVI) Units 1 ug 2 ug Panay Energy Development Corporation (PEDC) Unit 3.

Matud ni Chua dili gyud madawat nga ang atong mga dagkong power plant kalit lang nga ‘maguba’ sa samang higayon, nga nagbilin sa mga panimalay ug negosyo sa Cebu sa dakong kawalay kasigurohan.

Gipangayo sa CERA ang dayong congressional inquiry ug hugot nga audit sa Department of Energy (DOE) ug Energy Regulatory Commission (ERC) aron matino ang hinungdan sa balik-balik nga mga outage.

“Tinuod bang technical failures kini, o adunay kakulang sa hustong maintenance ug pagplano sa mga generation company?” matud ni Chua.

Gawas sa problema sa power generation, gipadayag usab sa CERA ang limitasyon sa transmission network sa nasod, ilabi na sa kapasidad sa mga interconnection nga nagdugtong sa Luzon, Visayas ug Mindanao.

Ang Mindanao-Visayas Interconnection Project (MVIP) sa pagkakaron nagtugot og power sharing nga hangtod 450 MW tali sa duha ka rehiyon, bisan pa man nga matud sa NGCP mahimo pang mapalapad ang kapasidad ngadto sa 900 MW.

Nanawagan ang CERA sa national government ug NGCP nga paspasan ang giplanong upgrade sa Luzon-Visayas interconnection gikan sa 440 MW ngadto sa 880 MW ug konsiderahon ang dugang pa nga pagpalapad sa kapasidad. (BANAT NEWS)