Tumulak nangayo og katin-awan sa CHD

CEBU, Philippines — Mangayo og katin-awan si Konsehal David “Dave” Tumulak sa Cebu City Health Department (CHD) kalabot sa pagkalangay sa pagproseso ug pagpalit sa mga tambal, medical supplies, medical equipment ug uban pa’ng importanteng panginahanglan sa Cebu City Health Department.

Gusto nga masabtan ni Tumulak, tsirman sa Committee on Health ang mga hinungdan sa pagkalangay lakip na ang mga problema ug babag nga mahimong nakaapekto sa proseso sa procurement.

Pinaagi sa maong lakang, gitinguha nga masiguro ang mas hapsay ug tukmang panahon nga paghatud sa mga importanteng tambal ug medical supply nga gikinahanglan sa mga lumulupyo sa siyudad.

Matud sa mga konsiderasyon nga gilatid sa resolusyon, ang pagkalangay sa procurement mahimong makaapekto sa tukmang paghatag sa mga serbisyo sa panglawas ug tabang medikal sa katawhan ingon man sa episyenteng pagpatuman sa mga programa ug responsibilidad sa CHD. Gihangyo usab ni Tumulak ang CHD nga mohatag og procurement timeline o tracker aron masubay ang proseso gikan sa pagsugod sa procurement hangtud sa paghatod sa mga napalit nga tambal, medical supplies ug equipment.

Importante kini aron mailhan kon asa nga bahin sa proseso adunay mga babag ug unsa nga mga lakang ang posibleng gikinahanglan aron malikayan ang dugang nga pagkalangay.

Si Tumulak nagkanayon nga kong mas klaro ang kahimtang sa procurement, mas sayon alang sa mga hingtungdan buhatan ug sa konseho ang pag-monitor sa mga kinahanglanong tambal nga angay maabot sa mga health center ug uban pa’ng serbisyo sa panglawas. BDB BANAT NEWS