Mandaue nisugyot og P85 milyon sa pagpaayo sa dalan ug drainage
CEBU, Philippines — Gisugyot sa Mandaue City Government ang paggahin og ?85 milyones alang sa pagpaayo sa dalan ug drainage sa Potenciano Larrazabal Avenue duol sa Cebu Doctors’ University (CDU) tungod sa dugay na’ng problema sa dalan nga nakaapekto sa mga motorista lakip sa mga drayber sa public utility vehicles (PUVs).
Ubos sa gisugyot nga 2027 budget, ?40 milyones ang gitagana alang sa pagtukod sa dalan sa Planned Unit Development (PUD) 1 atbang sa CDU, samtang laing ?45 milyones ang gigahin alang sa pagtukod sa dalan ug drainage sa PUD 1 duol sa Adnama.
Matud ni Atty. Gonzalo Malig-on Jr., city administrator nga giplano na ang maong mga proyekto sa wala pa nikatap diha sa social media ang mga reklamo kabahin sa kahimtang sa dalan.
Gipasabot niya nga wala naapil ang maong mga proyekto sa budget karong tuiga tungod kay hapit na mahuman ang proseso sa pag-andam sa badyet sa niaging administrasyon dihang nilingkod si Mayor Thadeo Jovito “Jonkie” Ouano.
Matud usab ni Malig-on nga ang pag-andam sa budget alang sa 2027 maoy higayon sa kasamtangang administrasyon nga mailhan ug maapil ang mga proyekto nga giila niini isip prayoridad.
Samtang naghulat pa sa dagkong proyekto sa sunod tuig, gimandoan na ni Ouano ang City Engineering Office nga ayohon dayon ang mga nadaot nga bahin sa dalan sugod kagahapon ug ipadayon sa mosunod nga mga adlaw.
Gibutyag ni Malig-on nga mag-fucos ang temporaryong pag-ayo sa mga bahin sa dalan nga adunay dagkong lungag imbes nga tibuok karsada nga nagkinahanglan og mas dako nga pondo. Apil ang gisugyot nga alokasyon sa 2027 Annual Investment Program sa siyudad ubos sa 20 percent Development Fund ug ang City Engineering Office ang mopatuman sa mga proyekto.
Kagahapon, nakasinati og kalisod ang mga motorista nga niagi sa maong bahin sa dalan tungod sa mga lungag.
Ug mas maglisod ang mga motorista kon mag-ulan tungod kay mapuno og tubig ang mga lungag diin lisod matino ang giladmon niini. BDB BANAT NEWS
- Latest



















