Babayeng hiker nga na-missing nakit-an ug luwas na
CEBU, Philippines — Nakit-an na ug luwas ra ang 23-anyos nga babayeng gikatahong nawala sa hiking trail sa bukirang bahin sa Cebu City niadtong Huwebes, Oktubre 8, 2026.
Sumala sa kapulisan, gi-report sa pamilya ang pagkawala sa babaye human kini wala makauli sa ilang panimalay sukad pa niadtong miaging adlaw.
Nakit-an ang bababye nga giila sa alyas nga “Shan,” 23-anyos, pasado alas 5 sa kadlawon niadtong Biyernes, Oktubre 9, human sa search and rescue operations nga gihimo sa mga personnel sa Cebu City Disaster Risk Reduction and Management Office (CCDRRMO), mga boluntaryong hiker ug ubang rescuers.
Matud ni Ferl-John Carabio Pacaldo sa CCDRRMO, nahuman ang ilang operasyon sa pagpangita alas-5 sa buntag.
Base sa inisyal nga impormasyon, nag-inusara ang babaye sa pagsaka sa bukid sa dihang nawala kini.
Ang iyang mga gamit nakit-an sa usa ka abandonadong balay sa Sitio Huya, Barangay Tisa, duol sa tindahan nga nailhang “Kopi Ben.”
Gidala ang babaye sa tambalanan tungod sa minor injuries nga iyang naangkon.
Nagsugod alas 12 sa tungang gabii ang pagpangita sa babaye sa Pamutan Trail, ilabi na sa Spartan Trail tali sa Starbucks ug Toong sa Barangay Pamutan.
Nakatabang sa operasyon ang mga boluntaryo, kawani sa Barangay Pamutan, mga hikers, Bureau of Fire Protection (BFP) ug CCDRRMO. Gisusi pa sa mga awtoridad ang mga sirkumstansiya sa pagkawala sa babaye aron matino ang tinuod nga nahitabo sa wala pa kini makit-an.— IBM BANAT NEWS
- Latest
