Mga mag-uuma nagbuhi og tilapia nga dugang sa ilang panginabuhian
CEBU, Philippines — Dili lang pagpananom og lagotmon ang mahimong panginabuhian sa mga mag-uuma sa Dakbayan sa Sugbo diin sa Barangay Tabunan usa ka tilapia production project ang nakahatag og dugang kita sa mga lokal nga mag-uuma human malamposon sila’ng nakaani og 105 ka kilo nga tilapia.
Kini ang usa sa mga proyekto sa Cebu City Agriculture Department (CAD) nga gisuportahan sa Bureau of Fisheries and Aquatic Resources (BFAR) aron adunay malungtarong panginabuhian ang mga mag-uuma sa bukirang bahin sa siyudad.
Pinaagi sa mga tilapia fingerlings ug feeds nga gihatag sa BFAR lakip ang pond liner nga gikan sa CAD malamposong nakapadako og tilapia sila si Honorable Roberto Alemorin ug Alfie Sorela.
Ang 105 ka kilo nga tilapia gibaligya sa ?180 matag kilo diin adunay bugti ang ilang kahago nga nikabat ngadto sa ?18,900.
Giawhag sa duha ang ubang mag-uuma nga magbuhi og tilapia aron ang kita mahimong dugang nga suporta sa ilang panginabuhian.
Gawas sa pagbuhi og tilapia, gihingusgan usab sa CAD ang integrated farming diin ang tubig gikan sa fish pond mahimong gamiton sa pagbisbis sa mga tanom.
Pinaagi niini, mamenosan ang pag-usik sa tubig ug makasuporta sa mas sustainable nga pamaagi sa pagpanguma.
Gipasalamatan sa CAD ang mga mag-uuma nga nagpadayon sa pagsuporta sa mga programa sa siyudad ingon man ang BFAR tungod sa pakigtambayayong ug paghatag sa gikinahanglang suporta alang sa proyekto.
Ang Tabunan tilapia project nagpakita sa panaghiusa sa kagamhanan, mga ahensiya ug lokal nga mag-uuma nga mahimong magbukas og bag-ong oportunidad sa panginabuhian. BDB BANAT NEWS
- Latest




















