Taxi gidaro nalahus sa bakilid

CEBU, Philippines — Patay ang usa ka taxi driver human gidaro og truck ang iyahang black taxi nga naka park kilid sa karsad sa Barangay Lugo, Lungsod sa Borbon, Probinsiya sa Sugbo kagahapon pasado alas-8 sa buntag kagahapon.

Giila ang biktima nga si Junnel Arcilla Cahayagan, 41, residente sa naasoy nga dapit samtang ang nagmaneho sa truck nga midaro sa black taxi mao si Mark Edward Maspara Abano, 36, nagpuyo sa Barangay Tabunok, Talisay City.

Nasayran nga ang biktima bag-o lang nirelibo sa kaubang driver, apan samtang nanglimpyo kini sa windshield kalit nga mibangga sa luyo nga bahin niini ang trak ug nadaro kini padung sa bakilid nga bahin kilid sa dalan.

Daling gidala sa tambalanan ang biktima apan gideklarar patay na pagabot sa tambalanan.  Samtang ang trak wing van natumba sab diha kilid sa dalan.

Giandam na sa kapolisan ang kasong Reckless Imprudence Resulted to Homicide and Damage to Property ang driver sa truck.

Sa pikas bahin, dili mominos sa walo ka mga managlahing aksidente sa mga sakyanan ang natala sa Cebu City Transportation Office/Road Management Authority alas-4:45 sa buntag adlaw nga Huwebes sa may Cebu South Coastal Road dapit sa SRP.

Si Raquel Arce, ang pangulo sa Road Management Authority/CCTO miingon nga daw maghilak ang adlaw kung walay maaksidente sa CSCR sa habig sa SRP.

Sumala pa ni Arce, kagahapon walo ka managlahing aksidente sa sakyanan ang natala ilabi na sa habig sa viaduct padung sa amihanan nga bahin nga nakaangol sa mga nagmaneho ug sakay sa motorsiklo.

Gihulagway ni Arce nga susama og record breaking kini human ang maong vehicular accidents nahitabo sa susamang oras apan sa managlahing dapit sa CSCR.

Gitan-aw nila nga rason mao ang pagdalidali sa mga motorista aron dili ma-late sa ilang mga trabaho. Si Arce niawhag sa mga motorista nga mosayo og biyahe aron dili magdali-dali sa pagmaneho. (BANAT NEWS)