Sakop og gang gipatay

CEBU, Philippines — Patay ang usa ka lalake nga giingong miyembro og gang human kini gipusil sa wala pa mailhing suspetsado sa Sta. Lucia Property, Barangay Poblacion Oriental, Lungsod sa Consolacion gabie sa adlaw’ng Lunes, Abril 29, 2024.

Ang biktima giila nga Kyle Florida, residente sa Barangay Pulpogan, Lungsod sa Consolacion.

Matud ni Police Lieutenant Colonel Verniño Noserale, hepe sa Consolacion Police Station nga alas-11 sa gabii sa adlaw’ng Lunes usa ka concerned citizen ang nitawag sa police station labot sa insidente.

Pag-abot sa kapulisan sa dapit ang biktima gahigda na sa yuta ug wala nay kinabuhi.

Gidala pa ang biktima sa Eversely Child Sanitarium Hospital sa Dakbayan sa Mandaue apan gideklarar nga dead on arrival.

Base sa imbestigasyon sa kapulisan, ang biktima nag-inusara og lakaw sa lugar dihang ang suspetsado kalit nga gipusil ang biktima.

Ang biktima nakaangkon og lima ka samad pinusilan sa dughan niini apan ang kapulisan wala’y nakuhang basiyo sa bala diha sa crime scene. Sigon ni Noserale, ang biktima miyembro matud pa sa fraternity o gang.

Niadtong Disyembre sa tuig 2023, ang biktima giingong nalambigit sa kaso sa pagpanunggab human matud pa gidunggab niini ang miyembro sa karibal nilang gang.

Sigon ni Noserale, mao kini ang ilaha karong gisusi nga posibleng motibo ug kun nalambigit kini sa uban pang mga krimen sama sa tulis o lungkab.

“Last December nakadunggab ni siya…. Kay base on CCTV footage and Barangay report it could be a member of the Bloods (gang) and nadunggaban ani na injured lang, wala sad nipasaka og kaso ang katong victim,” sigon ni Noserale.

Padayon hinoon ang imbestigasyon sa kapulisan sa Lungsod sa Consolacion labot sa maong hitabo.  IBM BANAT NEWS