Menor patay, kauban angol sa pagpamusil
CEBU, Philippines — Patay ang usa ka 17-anyos nga bayong-bayong human kini pusila samtang nagsakay og e-bike sa wala mailhing mga kriminal diha sa Urgello Street, Barangay Sambag 1, Siyudad sa Sugbo kagahapon sa kadlawon.
Ang menor nga namatay residente sa Barangay Sawang Calero niining siyudad.
Base sa imbestigasyon sa kapolisan nga ang mga kriminal tulo ka tawo kinsa nagsakay og kolor puwa nga motorsiklo.
Sa wala pa nahitabo ang insidente ang biktima kuyog sa iyahang mga amigo nagduwa og online game diha sa usa ka internet shop nga duol usab sa lugar nga nahitaboan.
Ang biktima ug ang tulo ka kauban niini paingon na nga manguli niadtong higayona human sa ilang duwa ug nisakay sa e-bike kinsa ang biktima maoy nagmaneho.
Si Police Major Mark Don Alfred Leanza sa Abellana Police Station nagkanayon nga nasugatan sa grupo sa biktima ang mga kriminal kinsa nagsakay og motorsiklo.
Giingong gibalikan sa mga kriminal ang grupo sa menor ug usa kanila ang nangutana ngadto sa biktima nganong tabis (hait) kini og tinan-awan dayon pusil.
Patay diha-diha ang biktima human kini naigo sa iyang ulo ug naangol ang laing menor de edad nga kauban niini kinsa naigo sa bukton ug ang bala nilahos sa tiyan sa maong pagpamusil.
Ang mga kriminal daling nisibat human sa hitabo ug padayon pa kining gipangita sa mga polis.
Ang kapolisan nagpahigayon og follow up nga imbestigasyon pagpiho sa motibo sa maong krimen.
Lakip sa motibo nga gisusi karon sa kapolisan mao ang kabahin sa ilegal nga drugas, gang war o adunay nakakontra ang grupo. Nasayran sa kapolisan nga kalibre .45 nga pistola ang armas nga gigamit sa pagpamusil. (BANAT NEWS)
- Latest