Mga sakop sa transport sector niapas sa franchise consolidation

CEBU, Philippines — Pipila ka mga sakop sa transport sector ang niapas sa pagproseso sa franchise consolidation atol sa kataposang adlaw niadtong Abril 30, 2024 nga gihatag kanila sa Land Transportation Franchising and Regulatory Board (LTFRB).

Ang liason sa nagkadaiyang kooperatiba gikan sa Metro Cebu ang nagkapoliki sa pagproseso sa consolidation sa ilang mga miyembro nga gihulagway nila nga langayan ug naghuwat sa deadline. Nasayran nga kadaghanan sa mga wala motiwas sa franchise consolidation nagdahom nga aduna pa gihapoy lugway.

Matud ni LTFRB Director Eduardo Montealto nga hangtud ra sa alas 5:00 sa hapon niadtong Martes ang pagduso sa consolidation ug wala nay lugway pa.

Ug kadtong naproseso na gikinahanglan pa nga susihon sa LTFRB kong nakatuman ba sila sa gipangayong lagda lakip na ang kamatuoran nga nahisakop sila sa grupo o kooperatiba.

Gibutyag ni Montealto nga 9 mil ka PUJ ang consolidated na o 86.4 percent rate base sa ilang talaan.

Dugang ni Montealto nga kadtong wala maka-consolidate nga mobiyahe mamahimo nang dakpon sugod sa Mayo 2, 2024 hinuon adunay option ang mga PUV nga dili ma-consolidate nga ipa-drop sa hurisdiksiyon sa LTFRB aron mabalik sa pagkapribado ug magamit gihapon ang sakyanan apan kong mapamatud-an nga gamiton kini sa pagpamasahero makabayad kini og dakong multa. (BANAT NEWS)