Pamilya na-trapped sa nasunog nga balay  

CEBU, Philippines — Patay ang magtiayon apil na ang duha nila ka anak human sila natanggong sa nasunog nilang panimalay diha sa Sitio Sta. Lucia, Barangay Tinago, siyudad sa Sugbo kagahapon sa kaadlawon.

Ang mga nakalas mao ang magtiayon nga sila si Rosita ug Parulito Otadoy nga nag-edad og 54 ug 60 anyos, apil ang duha nila ka mga anak nga mga menor de edad nga nag-edad og 12 ug 14 anyos.

Naangol sab sa maong hitabo sila si Sean Roby Ruelan, 21, nga nakaangkon og  samad sa tuo nga tiil; ug ang mga nangapaso nga sila Rose Ann Otadoy, 33; Jemar Otadoy, 36; Emarie Otadoy, 36; Keira Otadoy; Christopher Otadoy; ug Dylan Otadoy.

Sigon ni Monaliza, anak ug igsuon sa mga namatay nga ang ilang ginikanan ug duha ka mga igsuon naa sa third floor sa natulog.

Nakamata siya nga ang kalayo duol na sa ilang panimalay maong gibitbit dayon niya iyahang tulo ka mga anak ug igo nalang siya sa pagsiyagit.

Paggawas niya nakit-an niya ang iyahang ate ug kuya apan wala ang ilang ginikanan ug duha ka igsuong mga lalake.

“Nisyagit gyud ko, igo lang gyud ko sa pagsyagit kay maglisod naman ko, mosaka pako sa third floor ma-trap niya mi, naa pa baya koy gibitbit bata, gisiguro gyud nako akong mga anak, igo ra gyud ko pagsiyagit,” sigon ni Manolisa.

Kapin P7 milyones ang gibiling danyos sa maong sunog nga niugdaw sab sa laing 13 ka mga panimalay ug tulo ang nakan-an sa kalayo.

Temporaryong gipahiluna sa Tinago Gym ug giatiman na sab sila sa City Social Welfare and Services sa Cebu City Government ang mga nasunogan.

Ang tigpamaba sa Cebu City Fire Department Senior Fire Officer 3 Wendell Villanueva, nibutyag nga mopahigayon pa og imbestigasyon sa nahitabo.

Si Villanueva niawhag sa katawhan nga magmatngon sa kanunay ilabi na nga hinayhinay ng nasinati ang grabe nga kainit sa panahon.

Samtang si Mayor Michael Rama kinsa tua sa kaulohan nibutyag nga  ini’g abot niya karong  adlawa iyang pakigkitaan ang mga biktima. --  IBM  BANAT NEWS