13 ka gidudahang Maute nagpatambal sikop
CEBU, Philippines – Trese ka mga gidudahang sakop sa Maute-ISIS terror group nga nakaikyas gikan sa Marawi City ang gidakop sa kapolisan sa Pagadian City sa Zamboanga del Sur human nga sila pulos nagpatambal sa usa ka lokal nga tambalanan sa maong probinsya.
Sumala pa sa report sa Philstar.Com, ang mga gidakop naglangkob sa tulo ka mga babaye diin usa kanila kritikal ang kahimtang ug nidiretso sa Zamboanga del Sur Medical Center niadtong Biyernes sa buntag.
Ang Marawi City gihamok sa teroristang Maute-ISIS sukad pa niadtong Mayo 23 hinungdan sa pagdeklarar ni Pres. Duterte og martial law sa tibuok Mindanao, samtang gibanabanang kapin 100 mil ka tawo nga namuyo sa maong siyudad ang namakwit ug daghang nangamatay gikan sa habig sa gobiyerno, mga terorista ug mga sibilyan.
Si Chief Superintendent Billy Beltran, Regional Police Office-9 director mibutyag nga ang hospital staff sa maong tambalanan nagduda sa mga pasyenteng gidala sa ilang tambalanan hinungdan nga gipahibalo nila kini sa kapolisan. Sa trese ka mga gidudahan, ang kritikal kanila mao si Junaid A Dimarugong alias Ameodin Ameril samtang ang duha kanila nagpositibo sa paraffin test nga usa sa mga ilhanan nga posibleng nakapabuto sila og armas.
Ang kadaghanan kanila nagpuyo sa Salvador (sa habagatang bahin sa Marawi City) apan sa probinsya na sa Lanao del Norte; samtang ang lima kanila taga New Capitol, ug Barangay Bario sa Marawi City.
Ang usa sa mga taga Marawi City gitanggong na sa kapolisan samtang ang usa gibantayan sa tambalanan ug ang uban gipaubos pa sa imbestigasyon ang tinud-anay nga pagkatawo.
Tungod sa kagubot sa Marawi City naghigpit ang tanang mga lugar sa tibuok Mindanao tungod sa kabalaka nga maabot sa ilang mga dapit ang kagubot ug ang posibleng pag-ikyas sa mga Maute-ISIS gikan sa military cordon sa maong siyudad. - Gikan sa Wires/EIM (BANAT NEWS)
- Latest
