Pedong Ouano, 90, patay na

CEBU, Philippines - Namatay si kanhi Mandaue City mayor Alfredo “Pedong” Ouano alas 10:10 ang takna kagahapon sa buntag sulod sa Perpetual Succour Hospital sa iyang sakit nga prostate cancer.

Si Ouano nga amahan ni kanhi mayor ug karon Bokal Thadeo Ouano sa ikaunom nga distrito sa lalawigan sa Sugbo nagsaulog pa sa iyang ika-90 ka tuig nga adlaw’ng natawhan niadtong Oktubre 14.

Nagsugod siya sa iyang pagserbisyo sa kagamhanan sa dakbayan sa Mandaue isip konsehal sa makadaghang higayun ug nahimong bise mayor sulod sa tulo ka termino hangtod nga nahimo nga mayor sulod sa tulo sab ka termino.

Giila siya isip visionary mayor tungod kay sa panahon sa iyang administrasyon natigayon niya ang kaugmaran sa reclamation area nga mao karon ang nahimong alternatibong dalan nga kaagian sa mga sakyanan nga naggikan sa dakbayan sa Sugbo paingon sa amihanan.

Gimugna ni Pedong ang reclamation area nga wala’y utang ang panudlanan sa kagamhanan ug hinuon nakatampo kini sa pag-usbaw sa panudlanan sa dakbayan sanglit daghan na man ang mga patigayun nga gitukod sa maong lugar sa pagkakaron. (Romeo T.  Limpangog/GMR)(BANAT NEWS)