COA: P379.59 milyon nga mga proyekto wala mapatuman sa Lapu-Lapu
CEBU, Philippines — Gipanghimangnoan sa Commission on Audit (COA) ang Lapu-Lapu City Government tungod sa ?379.59 milyones nga mga proyekto nga wala mapatuman hangtud Disyembre 31, 2025.
Base sa 2025 annual audit report nga 29 lang sa 61 ka proyekto, o 47.54 porsyento ang nahuman o ongoing. Niubos kini gikan sa 69.01 porsyento nga implementation rate niadtong 2023.
Ang mga paglangan kasagarang nalambigit sa lot acquisition, engineering preparations, procurement ug dokumentasyon.
Sa 27 ka wala mapatuman nga infrastructure projects ubos sa current appropriations, 14 niini nga adunay total nga budget nga ?97 milyones ang anaa pa sa pag-andam sa program of works, estimates, plano ug detailed engineering.
Matud sa COA nga nagpakita kini nga adunay mga proyekto nga gilakip sa 2025 budget bisan wala pa mahimong procurement ug implementation ready.
Girekomendar sa COA nga ang mga proyekto lang nga andam na sa pagpatuman ang ilakip sa Annual Investment Program ug budget samtang irepaso ang mga proyekto nga dili na mahimo aron ma-reprogram o ma-prioritize pag-usab.
Gipangutana usab sa COA ang kapakyasan sa siyudad sa pagpatuman sa tukmang sanctions batok sa mga contractor sa upat ka proyekto nga nagkantidad og ?64.92 milyones nga adunay negative slippage nga 15 porsyento o labaw pa.
Lakip niini ang Jorge Tampus Road Phase I sa Basak nga adunay contract cost nga ?59.24 milyones. Gi-compute sa COA ang negative slippage niini sa 18 porsyento.
Duha usab ka classroom repair projects sa Bankal ang adunay 80 porsyentong negative slippage matag usa base sa computation sa audit team.
Giingon sa City Engineering Office nga gisubay niini ang progress sa mga proyekto ug nangayo og catch-up plans sa mga contractor kon moabot sa 10 porsyento ang slippage.
Apan matud sa COA nga ang mga proyekto nga adunay 15 porsyento o labaw pa nga negative slippage mahimong ikonsidera alang sa termination kon napamatud-ang kasaypanan sa contractor ang hinungdan sa pagkalangan.
Girekomendar usab sa COA ang mas lig-on nga koordinasyon tali sa City Engineering Office ug Bids and Awards Committee, mas hugot nga monitoring sa performance sa contractors ug pagpatuman sa termination proceedings kon gikinahanglan. BDB BANAT NEWS
- Latest





















