Osmeña nisugyot sa temporaryong pagpahunong sa mga multi-unit housing
CEBU, Philippines — Nisugyot si Bise Mayor Tomas Osmeña nga ipatuman ang moratorium o temporaryo nga pagpahunong sa pagtukod og mga multi-unit housing sa mga bukirang barangay gawas lang sa single-family homes tungod sa padayon nga kahuot sa dagan sa trapiko diha sa mga bukirang barangay.
Kagahapon, atol sa executive session si Osmeña nagkanayon nga kinahanglang limitahan ang mga kalamboan sa bukirang barangay hangtud nga mapalapdan ang Cebu Bus Rapid Transit (BRT) aron dili mohuot ang dagan sa trapiko sa mga kadalanan sa bukid.
Matud ni Osmeña nga ang padayon nga pagtugot sa dagkong housing developments makadugang sa kasamok sa trapiko ug makapalisod sa kinabuhi sa mga tawo nga nagpuyo sa maong mga lugar.
Gitumbok niya ang panginahanglan sa pagbalanse sa property rights diin dili lang sa mga tag-iya sa luna apan lakip usab sa mga residente nga dugay na’ng nagpuyo sa maong komunidad.
Sa iyang sugyot, dili na unta tugotan ang mga multiple housing sama sa duplex ug mga building nga adunay tulo o daghang andana.
Apan gitugotan gihapon ang usa ka tag-iya sa lote nga magtukod og usa ka balay alang sa ilang kaugalingon.
Miuyon si Konsehal Sisinio Andales sa sugyot ni Osmeña nga nagtumong sa paglimita sa mga bag-ong residential developments samtang wala pa mapalapad ang BRT ngadto sa mga bukirang bahin sa siyudad. BDB BANAT NEWS
- Latest

















