Mag-asawa, anak todas sa ambush!
MANILA, Philippines — Tatlong miyembro ng isang pamilya ang patay habang isa pa ang nasugatan matapos na paulanan ng bala ng mga armadong kalalakihan sa naganap na ambush sa Brgy. Nalinan, Sultan Kudarat, Maguindanao del Norte nitong Lunes ng hapon.
Sa report ni Bangsamoro Police Spokesman P/Lt. Col Jopy Ventura, kinilala ang mga nasawi na sina Ibrahim Payapat, misis nitong si Zenaida, 32, at anak na si Aisa, 16; pawang nagtamo ng mga tama ng bala sa iba’t ibang bahagi ng katawan.
Si Ibrahim ay dead-on-the-spot sa insidente habang ang misis at anak na babae ay binawian naman ng buhay habang nilalapatan ng lunas sa Cotabato Sanitarium and General Hospital sa Sultan Kudarat.
Ang 11-anyos na lalaking anak ng mag-asawa ay nasugatan sa insidente at patuloy namang nilalapatan ng lunas sa pagamutan.
Base sa imbestigasyon, pasado ala-1 ng hapon nang mangyari ang insidente sa nasabing lugar habang pauwi na sa kanilang tahanan ang maganak lulan ng tricycle na tinatawag nila sa lugar na “payong-payong”.
Ang pamilya ay inabangan umano ng mga salarin na nakitang umaaligid sa lugar bago ang krimen.
Sinabi ng opisyal na bigla na lamang pinaulanan ng bala ng mga armadong salarin ang nasabing pamilya saka mabilis na tumakas matapos na mapuruhan ang hinihinalang target na padre de pamilya.
Kasalukuyan nang inaalam ng mga awtoridad ang motibo ng krimen upang matukoy at maaresto ang mga suspect.
- Latest
