150 kabahayan nasunog

MANILA, Philippines – Umaabot sa P1 milyong halaga ng ari-arian ang naabo makaraang masunog ang 150 kabahayan sa Sitio San Isidro Labrador, Barangay Quiot sa Cebu City, Cebu noong Miyerkules ng gabi. Sa ulat ng Cebu City Fire Marshal, naitala ang sunog bandang alas-6:15 ng gabi habang ang karamihang pamilya ay katatapos lamang maghapunan at ang iba naman ay naghahanda na para matulog. Base sa police report na isinumite sa Camp Crame, nagmula ang apoy sa bahay ni Valeria Ogahayon kung saan mabilis na kumalat sa mga katabi nitong kabahayan. Naapula ang sunog dakong alas-7:34 ng gabi habang wala namang naitalang nasugatan o namatay sa naganap na sunog.