Salguero susama'g istilo ni Nietes

CEBU, Philippines - Nakita ni WBO light flyweight champion Donnie ‘Ahas’ Nietes nga mag-atubang siya og usa ka lisud nga away sa iyang first title defense batok sa Mehikanong si Felipe Salguero sa main event sa ‘Pinoy Pride XIV’ sa Hunyo 2 didto sa Resorts World Hotel and Casino sa Manila .

Si Nietes mitug-an nga nakakita na siya sa tapes sa mga away ni Salguero ug nabantayan niya nga adunay pipila ka similaridad ang ilang paagi sa pakig-away.

“Orthodox s’ya. Palaging nagja-jab sa baba tapos nago-overhead right. ‘Yung mga weaving-weaving n'ya… similar ang galaw namin,” matud pa ni Nietes sa ABS-CBN News.com.

Tungod niini, si Nietes nagkanayon nga dili sayun ang maong away ug paningkamotan niya nga makahimo og solusyon batok ni Salguero aron mulampos siya pagdepensa sa iyang bakus.

Si Nietes adunay record nga 29-1, 16KOs, samtang si Salguero nagbitbit og record nga 16-2, 11KOs. “Hindi ko sinasabing mana-knockout ko s'ya pero sa tingin ko magandang laban ito dahil magaling sya. Reading-ready na kong makipaglaban,” dungan pa niya.

Gawas ni Nietes moaway usab sa maong boxing card ang laing ALA boys nga sila si Milan Milendo batok ni Colombian Jesus Geles ug Genesis Servania batok ni Mexican Genaro Garcia. - BANAT NEWS