De ASis MVP sa PDBC

CEBU, Philippines - Gihagatan og pasidungog ang mga mananaug nga teams ug mga individual winners sa bag-o lang natapos nga Power Dealer Basketball Club (PDBC) nga gipasiugdahan mismo sa club founder nga si Arnold De Asis, kinsa maoy napiling MVP sa 2011 Second Conference basketball tournament kaniadtong Sabado sa gabii.

Ang champion team mao ang Yellow nga gipaluyohan sa Royale Power Dream, ang first runner-up mao ang White team nga gipaluyohan sa Blackwater ug ang second runner-up mao ang Red team nga gipaluyohan sa Uy Network. Ang tulo ka teams nakadawat og ganting cash ug ingon man usab mga tropeyo.

Gipasidunggan sab ang mga sakop sa Mythical Five nga sila si De Asis, Canio Echavez, Jojo Logronio, Weljohn Alarde ug Florentino Sayson kinsa pulos nakadawat og cash ug tagsa ka medalya.

Ang napiling Best Defensive Player mao si Rolly Maboles ug si Jonahs Mangyao maoy nakadawat sa Sportsmanship Award.

Human sa awarding ceremony, gihimo sab dayon ang election alang sa sunod nga club president sa 2012 diin midaug si sayson sa usa ka landslide.

Misaad si Sayson nga mas panindoton niya ang umaabot nga Summer League basketball tournament sunod tuig. (GGM)(BANAT NEWS)