Kanhi asawa ni Arenas babagan sa korte

CEBU, Philippines - Sa iyang pagka-player sa NBA, wala kaayo mabantug si Gilbert Arenas isip usa ka defensive stopper sulod sa basketball court apan mahimong molampos siya didto sulod sa courtroom.

Ang star guard sa Orlando Magic mipasaka og motion nga magdili o sa dili pagtugot sa pagpasalida sa VH1 reality series nga nag-ulohan “Basketball Wives” tungod kay naglagot si Arenas sa iyang kanhi asawa nga si Laura Govan kinsa maoy inahan sa upat niya ka anak kalabot sa iyang papel sa maong television show.

Gipaningkamotan karon ni Arenas nga dili gyud mapasalida ang gi-ingong kontrobersiyal nga reality show. Ang 29 anyos nga si Arenas nangayo sa korte ug preliminary injunction aron ang mga producers sa salida dili mahimong mogamit sa iyang ngalan o sa terminong “Basketball Wives.”

Si Arenas nga kanhi All-Star guard mikita na ug $100,637,492 sa iyang pagduwa sa Warriors, Wizards ug sa Magic sulod sa iyang NBA career.

Ang nahisgotang motion husayon karong Agosto 22, usa ka semana sa dili pa buksan ang maong reality show. Kung modaug si Arenas, ang salidang “Basketball Wives” mahimo nang tangtangon sa VH1’s programming schedule.   - BANAT NEWS