Solong liderato nasakmit sa UTASSCO Utility

CEBU, Philippines - Nasakmit sa UTASSCO Utility ang solong liderato human maka-eskapo uban ang 118-117 nga kadaugan batok sa Water Market sa nagpadayong Power Forty Basketball Tournament Christmas League didto sa Inayawan Sports Complex.

Sa laing duwa, ang Park 'N Go mihaon na gyud og daog sud sa tulo ka duwa human ilang gipilde ang F&E Electrical Supply sa iskor nga 80-77.

Si Wilbor Cabrera miantog og season-high 41 puntos aron pangulohan ang UTASSCO nga adunay 3-0 nga baraha. Si Alex Mercado miamot og 22 puntos, samtang ang team owner nga si Atty. Flor Yosores ug Rey Mabalcon parehong miamot og 17 puntos alang sa UTASSCO.

Ang Water Market nga nahimutang sa ikaduhang puwesto sa ilang 2-1 nga baraha, gipangulohan nilang Allan dela Rama ug Rony Unria nga nagkumboya'g 48 puntos, samtang si Vestre Eleguin miabuno og 21 puntos.

Ang CESAFI referee nga si Edwin Dejacto mi-iskor sab og double figures alang sa Water Market pinaagi sa iyang 18 puntos.

Sa laing bahin, si Michael Arias mibahog og 33 puntos alang sa 1-2 nga Park ‘N Go. Sila si Domie Ozon ug Lloy Dejarme mi-iskor sab og double figures nga parehong adunay tag-12 puntos.

Upat ka players sa F&E Electrical Supply, kinsa nagbitbit og 1-3 nga baraha ang mi-iskor og double figures pinangulohan ni Roger Cabatas sa iyang 18 puntos. Si Dodong Piezas miamot og 15 puntos, si Allan Lim adunay 14 puntos ug si Efren Mosqueda mitampo'g 13 puntos.

Puntos matag usa

Unang duwa:

UTASSCO (118) - Cabrera 41, Mercado 22, Yosores 17, Mabalcon 17, Felicitas 10, Yu 4, Atillo 2, Pestaño 2, Nacional 2

Water Market (117) - Dela Rama 25, Unria 23, Eleguin 21, Dejacto 21, Labalan 7, Yosores 7

Ikaduhang duwa:

Park ‘N Go (80) - Arias 33, Ozon 12, Dejarme 12, Echavez 8, Montuis 6, Rama 4, Filosopo 2

F&E Electrical (77) - Cabatas 18, Piezas 15, Lim 14, Mosqueda 14, Abasolo 6, Kalinga 5, Labajo 4, Pacquiao 2 (BANAT)