Record ni Elorde tupngan ni Nietes

CEBU, Philippines - Gipuntirya karon ni WBO minimumweight Donnie “Ahas” Nietes nga matupngan ang record ni Pinoy boxing legend Gabriel “Flash” Elorde isip labing dugay nga Pinoy boxer nga nakadepensa sa iyang bakus sud sa pito ka tuig. 

Kini mao ang gitubag ni Nietes sa pangutana kung unsay sunod niyang plano human sa malampuson niyang third title defense didto sa Mexico niadtong miaging Domingo batok sa Mehikanong si Mario “El Dragoncito” Rodriguez.

“Gusto nako tupngan si Gabriel “Flash” Elorde isip labing dugay nga Filipino world champion” matud pa ni Nietes atol sa usa ka welcome press conference kagahapon human sa iyang pag-abot dinhi sa Sugbu gikan sa kaulohan.

Si ALA Promotions President Michael Aldeguer namahayag nga suportahan nila ang hukom ni Nietes nga panalipdan usa ang iyang titulo sa 105-pounds division, sa dili pa niini hinuktukan ang plano nga pagsaka sa mas bug-at nga light flyweight division.

 “Donnie is still very much comfortable at 105 pounds, and this is where we’ll stay for the next defenses,” dugang pa ni Aldeguer.

Gisaysay usab ni Nietes ang kasinatian sa iyang sangka batok ni Rodriguez nga iyang gihulagway nga usa sa mga lisud niya nga title defense tungod kay gawas sa Mehikanong challenger, laing gisagubang sa ALA Boy mao ang grabeng kainit sa binyu.

Ang Team Nietes nga gipangulohan ni Edito “ Ala ” Villamor ug Dennis Cañete nagtuo nga ang grabeng kainit sa binyu maoy rasun sa pagkahurot sa hangin ni Nietes sa naghinapos nga rounds sa away.

Hinuon, gipasalig ni Aldeguer nga dinhi na sa nasud ang sunod binyu sa away ni Nietes, diin gipilian nila nga ipahigayun kini dinhi sa Sugbu o didto sa Bacolod, ang hometown ni Nietes.

Unang gikataho nga sangkaon ni Nietes ang ranked #1 challenger nga si Carlos Buitrago apan imposible kini tungod kay bata pa kaayo ang 19-anyos nga Nicaraguan alang sa usa ka world title fight.

Tungod niini, posibleng ang beteranong Thailander nga si Pigmy Kokietgym (42-5-2), ang sangkaon ni Nietes sa Disyembre ning tuiga. – BANAT NEWS