FERI kampiyon sa BAR Fiesta Cup

CEBU, Philippines - Naka-ipsot ang First Engine Rebuilder Inc. (FERI) ni team owner Jun Acero gikan sa mga kamot sa Team Kagawad sa overtime, 107-106 aron paglangkat sa korona sa Basketball Association of Ramos (BAR) 2009 Jun Pe Fiesta Cup diha sa Benjamin Solon Gym sa Barangay Cogon-Ramos, ning siyudad.

Ang Kagawad maoy unang milabaw sa iskor nga 26-14, apan kalit lang nanginit ang FERI pagsugod sa second period diin sila milusad og 25-15 nga rally aron pagsikit ngadto sa dos puntos sa halftime, 39-41.

Nahimong kulbahinam ang duwa gikan niadto hangtod nga si Dodong Rosaroso sa FERI mi-iskor og crucial basket sa daginutong oras aron tablahon ang duwa, 92-all nga miresulta sa overtime.

Padayon ang hinugtanay sa duwa sa dugang singko minutos diin nagpuli-puli kini'g ilog sa labaw hangtod nga si Tata Bensoy mipasulod sa iyang mahinungdanong basket sa katapusang 1.6 segundo aron baswaton sa kadaugan ang FERI.

Sila si Rosaroso ug Michael Ernie parehong mi-iskor og 18 puntos aron pangulohan ang FERI, samtang si Edly Monterroyo midugang og 16 puntos. Sila si Leo Villaver ug Coronel Bacullo miamot sab og 10 puntos matag usa alang sa FERI.

Si Bobby Ortega mipabuhagay og 46 puntos alang sa Kagawad, apan dili pa kini igo aron pagsalbar sa iyang team.

Sa sayo pa, ang Team 4 nga gipaluyohan sa Sillar/Briones Families mipukan sa Ginga Hot Mocha Coffee Mix, 107-100 aron pag-angkon sa ikatulong dapit. 
Unom ka players nga gipangulohan ni Larry dela Peña ang mi-iskor sab og double figures alang sa Team 4.

Si Glenn Birao mao sab ang topscorer sa Ginga pinaagi sa iyang 40 puntos, gisundan ni Jojo Baldago sa iyang 25, samtang si Erwin Ferrer miamot og 17 puntos.

 PUNTOS MATAG USA

Unang duwa:

Team 4 (107) - Dela Peña 35, Flores 13, Sillar 12, Celestial 12, Palma 12, Ararao 11, Brines 6, Cavalida 4, Gallway 2

Ginga (100) - Birao 49, Baldago 25, E. Ferrer 17, T. Ferrer 4, Miñoza 4, Viagedor 4, Getigan 3, Rosaldo 2, Sallego 1

Ikaduhang duwa:

FERI (107) - Rosaroso 18, Ernie 18, Monterroyo 16, Villaver 10, Bacullo 10, Bensoy 7, Nadal 7, Suico 6, Bernal 6, Famador 5, Acero 4

Kagawad (106) - Ortega 46, Zamore 24, Sabornido 14, Camota 6, Gudez 4, Pada 4, Gabutero 4, Membrano 2, Sabay 2   (BANAT NEWS)