Sausa bayani kadaugan sa Uptown Jaycees

CEBU, Philippines – Si Dindo Sausa mitusak og undergoal gikan sa maanindot nga assist ni Franco Te sa himalatyong oras sa duwa aron hatagan ang Uptown Jaycees Foundation of 85-84 nga kadaugan batok sa Mandaue Jaycees Team B ug aron pagsakmit sa solong liderato sa Jaycees Basketball Association (JBA) didto sa Benedicto College sa Mandaue City.

Ang Uptown Jaycees ni playing coach Dr. Boy Te migamit og 31-19 nga rally sa second quarter aron papason ang ilang 16-19 nga biya sa first quarter diin niposte kini og 48-38 nga labaw sa halftime. Padayong naglabaw og 10 puntos ang Uptown Jaycees sa katapusang 10 minutos sa duwa, 68-58, apan sa wala nila damha, nasakmit sa Mandaue-Team B ang labaw, 84-80 pinaagi sa ilang kaugalingong rally nga gipasiugdahan ni kanhi USC Warriors Archie Coros.

Ang tira ni Dennis Acebron ug duha ka free throws ni Army Marata maoy nakahatag og kuatro puntos nga labaw sa Mandaue Jaycees sa nahabiling 14 segundos sa duwa.

Nakasikit ang Uptown Jaycees human si Jimbo Noel mipasulod sa iyang three pointer, 83-84 ug dayon ang undergoal stab ni Sausa maoy nagselyado sa duwa.

Si Te, anak ni Boy Te maoy nangulo sa Uptown Jaycees pinaagi sa iyang 25 puntos, samtang si Sausa midugang og 23 puntos.

Ang pilderong Mandaue Jaycees-B gipangulohan sab ni Acebron, kinsa mibahog og 20 puntos, gisundan ni Army Marata sa iyang 15 puntos

Ang Uptown Jaycees kasamtangan karong nag-una sa standings nga adunay 5-1 win-loss record, samtang ang Mandaue Jaycees-B nagbitbit og 4-2 nga baraha.

 Sa laing duwa, ang Zone 360 nga gipangulohan ni Janjan Boniel mipukan sa Arcason sa iskor nga 81-77 alang sa ilang ikatulong daog sud sa unom ka duwa.

Si Niño Boniel miburak og 31 puntos lakip ang upat ka triples aron pangulohan ang Zone 360, samtang si Kent Kangleon maoy nangu sa Arcason sa iyang 23 puntos, gisundan ni Dexter So sa iyang 15 puntos.

Puntos Matag Usa

Unang duwa:

Jaycees Foundation (85) - F. Te 25, Sausa 23, Noel 18, C. Sta. Maria 10, Yu 4, P. Sta. Maria 3, B. Te 2

Mandaue-B (84) - D. Acebron 20, Marata 15, J. Acebron 14, Flores 13, Coros 10, Cortes 6, Balbuena 2, Salimbagat 2, Cal 2
Ikaduhang duwa:

Zone 360 (81) - N. Boniel 31, Lasala 15, Go 15, J. Boniel 10, Loma 4, Trespicio 4, De Jesus 2

Arcason (77) - K. Kangleon 23, So 15, Caya 10, Z. Kangleon 10, Peña 4, Lee 4, Lim 3, Hernandez 2, Sullano 2, Tecson 2, Jumawan 2 – BANAT NEWS