Lalis sa lapses

CEBU, Philippines - Niadtong unang semana sa Marso, kini si Mike Roma ug si coach Romy Cal sa CSD Power Brokers nagkahimamat ug nagkahigalaay tungod kay susama sila'g interes. Si Roma nag-representar alang sa bag-ong gimugna nga 1st M. Lhuillier Kwarta Padala Cup ug si Cal isip usa ka partisipante.

Pila may estorya, tungod kay managkaila na, kanunay silang magkontakay pinaagi sa text, tawag sa cellphone o landline ug saksi ako sa ilang panaghigalaay tungod kay nakatambong man ako og usa ka meeting kay maoy tuyo namong mga sportswriters nga makauna'g suwat.

Karon lang bag-o, atong nakita nga kalit kaayong mi-aslom ang panaghigalaay nilang Roma ug Cal, maong nakaingon ako nga "their friendship starts with basketball and it also ends with basketball."

 Duna ako'y ipaambit kaninyo nga pipila ka rason

 kun nganong nahitabo kini ug kamo na lang maoy

maantigo mohukom kinsay husto o kinsay sayop tali nilang duha.

* * *

Ang 1st M. Lhuillier Kwarta Padala Cup gibuksan niadtong Marso 15, adlaw'ng Domingo didto sa USC gym diin may 10 ka teams nga misalmot. Nagsugod ang torneyo nga nagdamuraw ang mga team owners ug coaches kay wala pa sila'y gihuptan nga ground rules ug format, ug kadaghanan sa ilang nadawat pulos lang 'verbal'. Apan wala na lang sila magkuti-kuti kay misalig sila ni Roma, ang nagpailang event organizer. Milabay ang 25 ka adlaw, gipang-apud-apod ni Roma ang ground rules Abril 5 sa gabii, adlaw gihapon nga Domingo.

Ambot nakasabot ba kaha kini si Roma sa iyang gibuhat nga unta kining mga prestihiyoso ug mga dagkung torneyo ilabi na sa CESAFI, usa ka buwan o labing duol, duha ka semana sa dili   magsugod ang torneyo, ipanghatag na daan ang ground rules ug hasta pa gani ang complete schedules ug mga ngalan sa collegiate ug high school players.

Sa laktod nga pagkasulti, gi-apura ug gisiging-siging ni Roma ang mga teams, apan ang iyang trabaho wala niya buhata.

Apan usa lang kadto sa mga palpak ni Roma.

Nisamot pagbukal ang dugo ni Cal ngadto ni Roma dihang iyang gisuspenso si Roy Arnado nga wala magpahibalo kaniya ug walay tukmang imbestigasyon ug labaw nang walay written communication. Wala kaugpo si Cal ug iyang gidawat ang hukom ni Roma.

Gitiwasan ang kapungot ni Cal ngadto kang Roma gikan sa nagbukal nga tubig ngadto na sa bulkan nga mibugwak og lava tungod kay iya mang gideklarar nga pilde ang Power Brokers pinaagi sa usa ka "forfeiture" batok sa Perfect Freight kay kuno usa ka oras kapin silang wala mobutho didto sa Minglanilla Sports Complex.

Didto sa Minglanilla, gibinaboy ni Cal og kasaba si Roma ug didto iyang gilitanya ang tanan niyang mga sayop o lapses kalabot sa pagdumala sa torneyo lakip niini ang walay tataw nga oras sa iskedyul nga pulos

lang verbal ug wala pa gyud sila hatagi og sakyanan kay kuno wala malakip sa gitawag og out-of-town games.

Gisaway kini ni Cal kay matud pa niya, ang duwa didto sa Minglanilla ug sa Consolacion gitawag kana'g out-of-town. Pasabot ni Cal nga bisan pa'g adto sa Carcar City ug Bogo City ang duwa gitawag kana'g out-of-town, dili out-of-the-city.

Gisukna ni Cal si Roma nganong didto sa Consolacion nga dili maoy first game ang Power Brokers, dugay man gisugdan ang duwa ug didto sa Minglanilla nga sila'y first game gisugdan man og sayo aron lang gyud sila ma-forfeit. Ang wala mapangutana ni Cal nga basin aduna ni kasuko si Roma kaniya nga wala niya hisayri.

 Pagka-sunod adlaw gikan sa pag-deklarar og forfeit sa Abril 5, nakigkita si Roma ni Cal didto mismo sa opisina sa naulahi sa Reliable Recruitment Agency sa Rain Tree Mall sa dalan F. Ramos diin sila nagkasabot nga pangitaan na lang og laing higayon ang duwa tali sa Power Brokers ug Perfect Freight. Apan inay notisya sa duwa ang iyang madawat, suwat man hinuon ni Roma nga nagkanayon nga iyang barugan ang iyang desisyon nga pilde gyud ang Power Brokers.

Nasuko si Cal kay kini kuno si Roma way baruganan, way buko-buko o spinal column mura'g bukya "jellyfish" nga naglutaw-lutaw sa dagat nga wala mahibalo asa idagsa.

Didto sa ground rules, mipirma si Roma isip Commissioner/Event Organizer ug didto sa forfeiture, si Roma mipirma isip deputy commissioner ug ang mipirma isip commissioner mao si Ernesto Hermosa nga wala gyud makita bisa'g usa ka duwa bisan og kutob na lang sa first half. Asa may tinuod ani? Sa ato pa, og para pahumot si Roma ang mopirma og sa mga kontrobersiya, manghunaw siya?

Atangi ang Part II diin mopasaka na'g civil case si Cal ngadto kang Roma aron pagguba sa iyang kredibilidad kun ugaling naa pa may nahabilin nga diyutay.

* * *

SG Miscellaneous. Happy Easter to all our BANAT readers. Congrats to Ms. Arlene Tongco who graduated her Law studies at the Gullas College of Law last week and her graduation party at the cozy Yayoy's Grill. She graduated BSED Major in English at the University of San Jose-Recoletos (USJ-R). While in Gullas College of Law, Tongco earned three major awards namely: the University Leadership Award, Dean's Academic Excellence and College of Law Service Award for being the vice-president of the Lex Circle. My hats off also to my four-year old niece Dezza Karylle P. Narvasa for garnering 3rd place on English and 2nd place on Chinese subject at the Childlink Learning Center. Keep up the good work. - BANAT NEWS