Di masulod sa bulsa
Simple ra ang pagsuway kun nagsulti ba sa tinuod o namakak ang nagmaskara nga saksi nga nangangkon og tikas sa miaging eleksiyon.
Atong tun-an og maayo ang iyang pangangkon nga dunay nahitabong operation dagdag bawas pabor kang Senador Benigno “Noynoy” Aquino III nga karon maoy nag-una sa tanang kandidato pagkapresidente.
Gani proklamasyon nala’y kuwang niya sanglit nangangkon naman sa ilang kapildihan ang iyang mga kaatbang gawas lang sa konbiktado nga si kanhi Presidente Joseph Estrada.
Matud sa saksi nga gi-angga-an ni Kongresista Teodoro Locsin Jr. og “Koala Bear” nga duna siya’y nahibaw-an sa tikas gamit ang mga Compact Flash Cards kun ang memory card sa PCOS machines diin didto i-save ang mga botos nga makuha sa matag kandidato.
Basi sa iyang pangangkon nga dunay mga singko milyones nga botos ni Gilberto “Gibo” Teodoro ang naadto kang Aquino. Laing mga tulo ka milyon gikan sa evangelist nga si Eddie Villanueva.
Gawas niini duna poy daku-dako nga botos nga dili niya matino ang gidaghanon nga na-iban gikan kang Estrada. Si Manny Villar giingong gitanyagan sa maong pagpanikas apan nibalibad kay dili kuno maka-afford sa gipangayo nga kantidad nga 20 pisos matag boto.
Apan si Makati Mayor Jejomar Binay mipalit og mga tres milyones botos sa kantidad nga kapin sa usa ka bilyon diin giingong nakabenipisyo sab si Aquino niini sanglit giingong giduso man ang Noynoy-Binay tandem.
Kun atong sumadahon ang pangangkon ni Koala Bear mogawas nga ang natikas ni Aquino mokapin pud sa 10 milyones botos. Si Aquino sa pagkakaron nag-una sa ihap sa PPCRV pinaagi sa 13,841,583.
Buot ba nga ipasabot ni Koala Bear nga bokya si Aquino sa miaging eleksiyon? Kun atong pinsadahon og maayo ang pangangkon sa saksi mogawas nga zero si Noynoy sa miaging eleksiyon.
Dili ba dakong imposible ang maong pangangkon? Busa alang sa mga kongresista nga misakay ni “Koala Bear” labaw pa mong hanggaw. Sa script writer sa maong salida, pagtuon usa og maayo aron imong masulod sa bulsa ang mga mabuot nga mga Pilipino.
* * *
- Latest
- Trending
