Gigubang kaugmaon

Giangkon sa nadakpang kriminal nga siya ang miposil patay ni SPO1 Pedro Sucion ug miangol ni PO2 Darius Conejos nga mitubag og alarma sa tulis sa dakbayan sa Mandaue kaniadtong kaadlawon sa Domingo. Pagdumot ang hinungdan sa iyang pagpatay sa biktima. Sa iyang pag-angkon iyang giasoy ang dautan niyang kasinatian sa mga kamot ni Sucion. Matud pa niya giguba ni Sucion ang iyang ugma. Nagtinarong unta kuno siya sa pagtuon apan gibutang-butangan, gitumo-tumoan ug gitamnan siya og ebidensya  nga maoy hinungdan sa iyang pagkabilanggo. Kun tinuod man ang iyang giasoy, luoy pod diay ang estorya sa iyang kinabuhi pero sa iyang gihimo misamot siya pagkamakaloluoy.

* * *

Akong gidayeg ang kaayo sa mga police sa dakbayan sa Mandaue kun hisgutan na ang paghipos og mga kasayoran mahitungod sa nahimutangan sa suspetsado sa pagpatay sa ilang kauban. Tungod sa maayong paghipos og mga kasayoran dali nga nadakpan ang usa sa mga suspetsado. Ang nakaapan lang sa police sa Mandaue kay hinay, di kamao molikay.

* * *

Gihimakak ni Mayor Jonas Cortes ang mga pasangil nga wala hatagi og suporta sa iyang administrasyon ang kapulisan sa dakbayan sa Mandaue dungan sa pagpasingit ngadto sa kadagkoan sa kapolisan. Matud pa sa mayor nga dili obligasyon sa mga local government units ang paghatag og sakyanan ug uban pa sa mga police nga nadistino niini. Gipangitaan sa mayor ang kapulisan sa gahin alang sa pagpamalit og mga sakyanan ug mga armas nga magamit unta sa operasyon sa kapolisan. Sakto si Mayor Jonas Cortes sa iyang gisulti. Sa pagkakaron ugod ang atong kadagkoan sa kapolisan nagsalig na lang pod sa mga local government units nga makahimo sa paghatag og ayoda ngadto sa ilang mga sakop. Huna-hunaa kuno na ninyo pila ka police station ang walay mga patrol cars ug wala usay mga service firearms.