Ilad ug panguot

Niay kasinatian sa usa nato ka magbabasa nga nabiktima sa panguot ug diriyot pod mabiktima sa pangilad pinaagi sa text scam. Maayo kaayong pagkadetalye ang iyang text mao nga akong nahukman nga ipatik ang katibuk-an niini. Hinaot nga ang iyang kasinatian magsilbing pahimangno kaninyong tanan aron dili kamo mabiktima sa bisan unsang matang sa tinonto o modus operandi.

* * *

Ang iyang text nagkanayon: "Good day, Sir. Nag-atang ko sa gawas sa Sto. Rosario Parish para pauli. Nisakay ko sa PUJ nga 10F biyahe paingon Pardo. Pagtikang pa lang nako sa jeep gipiit na ko sa tulo ka tawo.

"Paglingkod nako sa jeep kay nangambak ang tulo ka tawo nga nipiit nako. Sa akong pagtan-aw sa akong bolsa nabali na kini ug wala na ang akong cellphone. SIla gyoy nagkuha niadto.

"Dinha gihapon sa gawas sa Sto. Rosario nisakay kog 13C. Akong kasakay gipiit pod. Tulo gihapon sila nga nagpiit niya. Paglingkod niya, wala na ang iyang cellphone ug nangambak na ang tulo. Unta pabutangan nag polis dinhang dapita between 6:00 PM to 8:PM kay daghan kaayo na silang mangunguot diha. Magdalag bag. Desenteng tan-awon.

* * *

"Nia pay lain. Giteksan (text) sad ko nga nakadaog kuno og P1 million. Tagalog speaking ang nagpaila nga abogado. Promo kuno sa PCCNS. Siya kuno si Atty. AZA (initial). Iyang number 0920-8905115. Bantayi ninyo kining numeroha. Tingalig di lang ako ang giteksan aning tawhana." -- 0918-9144415 (Sent: March 21, 2006-- 19:34:37)

* * *

Daghan bitaw ang nagsulti nako nga naay daghang mangunguot diha sa gawas sa Sto. Rosario nga maoy paboritong biktimahon ang mga pasahero nga maghulat og sakyanan dihang dapita. Busy kaayo kanang lugara mao tingali nga mosalir gayod ang pagpasalir sa mga badlongon sa katilingban sa ilang tinonto. Nakasigpat ko nga may polis diha nagpasilong sa landong, dili makabantay kon adunay mahitabo sa mga pasahero nga nag-atang og kasakyan.

Bahin sa text scam, karaan na kaayo ang maong estilo sa modus. Pero may nailad pa gayod tingali niini maong nagpadayon pa kini hangtod karon.

Sumbong ug reklamo? Text sa 0910-8105522