Acting Ombudsman kinalampag: Kasong administratibo vs PCSO execs pinababasura
MANILA, Philippines — Kinalampag kahapon ng ilang kasapi ng Association of Retired RTC Judges of the Philippines Inc. (ARRJOP) at Philippine Judges Association (PJA) si Acting Ombudsman Dante Vargas na agarang umaksyon at ibasura na ang administrative case na isinampa ng ilang miyembro ng Sangguniang Panlalawigan ng Camarines Sur laban sa mga opisyal ng PCSO.
Ito ay may kinalaman sa renewal ng lisensya ng STL operator sa nasabing probinsya.
Sa nasabing reklamo, idinawit ang dating Judge at si PCSO chairman Felix P. Reyes na isa sa mga aplikante bilang susunod na Ombudsman. Noong Agosto 4, 2025 ay naghain si Reyes ng Ex-parte Motion para tanggalin siya bilang respondent sa naturang administrative case. Gayunman, mula nang ihain ang nasabing mosyon noong si Deputy Ombudsman Mariflor Punzalan-Castillo ang nakatalagang acting Ombudsman ay hindi pa ito inaaksyunan ng naturang tanggapan, gayundin ang joint affidavit na isinumite ng mga opisyales ng PCSO noong Hunyo 11, 2025.
“PCSO Chair and retired RTC Judge Felix P. Reyes is cited in the complaint, however, there is no single act imputed by the complainants to Judge Reyes whence criminal or administrative infraction may arise. As director/chairman of the board, Judge Reyes has no involvement in the day-to-day operations of the PCSO. His role is merely on the policy level - presiding over meetings on matters being deliberated upon by the board,” paliwanag ng nasabing grupo.
Dahil dito, iginiit ng mga nasabing miyembro ng ARRJOP at PJA na ilabas na ang desisyon upang mabura ang agam-agam ng publiko na may kinikilingan si Vargas lalo na’t matunog na naghain na rin ng mosyon si Justice Secretary Jesus Crispin “Boying” Remulla para ibasura ang reklamong isinampa laban sa kanya ni Sen. Imee Marcos.
May kaugnayan ang reklamo ni Sen. Marcos sa umano’y papel ni Remulla sa pagsuko kay dating Pangulong Rodrigo Duterte sa International Criminal Court (ICC) noong Marso 2025 kaya tulad ni Reyes ay wala pang clearance ito sa Office of the Ombudsman na kailangang para maisama ang kanilang pangalan sa shortlist.
- Latest
