Lima way swerte sa swertres nasikop
CEBU, Philippines — Nadakpan sa kapolisan ang lima ka tawo nga nagpasiugda og ilegal nga swertres sa Barangay Suba, Dakbayan sa Danao alas 9 pasado sa niaging gabii.
Si Police Officer 2 Mark Anthony Manulat sa Danao City Police Station niila sa mga nadakpan nga sila si Valentin Ramos Ramonada, 55; Joel Dagalon, 51; Rosebe Rosal, 22; Emerson Lao, 28 ug Joseph Booc, 23, pulos nagpuyo sa maong dapit.
Ang team sa kapolisan nga gipangulohan ni PO3 Phil Restauro ang nagpahigayon og operasyon labot sa ilegal nga kalihukan sa maong dapit.
Nunot sa maong operasyon ilang nasakmit ang 141 ka stubs nga adunay nagkadaiyang kombinasyon sa numero sa ilegal nga swertres, lima ka calculators, mga ballpens ug uban pa.
Gihimo nila ni Restauro ang pagdakop sa mga ilegal nga kalihukan nga naglakip na sa ilegal nga swertres nga tago-tago nga operasyon sa maong lugar. (BANAT NEWS)
- Latest
