17-anyos nanunggab atol sa Sinugdan sa Danao Parade
CEBU, Philippines — Gipangita karon sa kapolisan ang 17-anyos nga menor de edad nga gipasanginlang nanunggab sa usa ka 22-anyos nga lalaki atol sa Sinugdan sa Danao parade sa National Road, Barangay Poblacion, Danao City, niadtong Huwebes sa gabii, Septiyembre 10.
Giila sa kapolisan ang biktima nga si alias “Kim,” 22, usa ka laborer ug residente sa Purok Bilong-Bilong, Barangay Looc, Danao City.
Gidala si Kim sa Cebu Provincial Hospital alang sa pagtambal human siya makaangkon og duha ka samad sa likod tungod sa pagpanunggab.
Matud sa Danao City Police Station, nahitabo ang insidente pasado alas-8 sa gabii samtang nagpadayon ang Sinugdan sa Danao parade sa National Road sa Barangay Poblacion.
Base sa inisyal nga imbestigasyon, giingong miduso ang 17-anyos sa usa sa mga kauban ni Kim. Tungod niini, misulay si Kim sa pagpakalma sa menor de edad, apan misamot ang panaglalis tali nilang duha.
Giingong mikuhag hait nga hinagiban ang 17-anyos ug gidunggab si Kim kaduha sa likod ug dali dayung niikyas uban sa iyang mga kauban.
Giandam sa kapolisan ang tukmang mga kaso nga mahimong ipasaka batok sa menor de edad, depende sa resulta sa imbestigasyon ug medical findings sa biktima, ug subay sa mga probisyon sa Juvenile Justice and Welfare Act.— IBM BANAT NEWS
- Latest
