“Bombing” og basura sa Mandaue gipanid-an

CEBU, Philippines — Gihingusgan sa Mandaue City Government ang pagmonitor batok sa mga indibidwal nga tuyo nga maglabay og mga sinakong basura sa mga pampublikong lugar, ilabi na sa North Reclamation Area.

Matud ni City Mayor’s Office-Safety Maintenance Area Response Team (CMO-SMART) leader Gerard Glenn “RD” Soon Gobalani sa usa ka interbyu, apil sa ilang ginamonitor ang gitawag nilang “bombing,” diin gamiton ang mga sakyanan o trisikad sa pagdala ug paglabay sa mga sako sa basura sa mga sidewalk ug center island.

Lakip sa mga lugar nga ilang gi-monitor ang North Reclamation Area ug ang lugar duol sa Cebu International Convention Center (CICC) sa Barangay Tipolo.

“Diha jud sa may sa Cebu International Convention Center (CICC)...sa dark portion sa kilid. Usa na sa atong mga gitan-aw,” matud niya.

Matud ni Gobalani, kasagarang mahitabo ang illegal dumping sa sayo sa kabuntagon, panahon nga gamay pa ang mga tawo sa lugar.

Gitan-aw usab sa team ang sulod sa mga sako nga gibiyaan aron mahibal-an kung asa posibleng gikan ang mga basura.

Base sa ilang monitoring, nakita nga ang mga basura morag gikan sa mga panimalay ug dili gikan sa mga komersyal nga establisemento.

Ang mga madakpan nga naglabay og basura sa mga lugar nga dili tukmang labayanan mahimong maisyuhan og citation sa Mandaue City Environment and Natural Resources Office (MCENRO), samtang motabang usab ang mga eco-warden sa pagdakop sa mga malapas.

Matud ni Gobalani, hugot usab nilang ginamonitor ang illegal dumping tungod kay ang natapok nga basura mahimong hinungdan sa pagbara sa drainage systems ug pagdagsa sa tubig, ilabi na panahon sa ting-ulan.

Tungod sa ting-ulan, giawhag ni Gobalani ang mga residente nga sa hustong labayanan kini ilabay ug i-segregate ilang mga basura.

Matud pa niya, ipadayon sa siyudad ang pagpalig-on sa monitoring efforts isip kabahin sa pagpangandam alang sa ting-ulan. — /IBM (BANAT NEWS)