Pagtukod og DOH-run hospital sa matag probinsiya giduso
CEBU, Philippines — Giduso sa mga magbabalaud ang pagtukod og ospital nga dumalahon sa DOH sa matag probinsiya.
Si House Minority Leader Marcelino “Nonoy” Libanan kauban ang laing lima niduso og balaudnon nga nagtinguha sa pagbutang og dili mominus usa ka tertiary hospital nga direkta nga dumalahon sa Department of Health (DOH).
Sa gipagawas nga press release gipadayag nga ang House Bill No. 11349, nga gitawag og “Tertiary Hospital in Every Province Act,” nagtinguha nga masulbad ang kakuwang sa mga specialized ug critical medical services, ilabi na sa mga probinsiya nga kuwang kaayo sa government tertiary hospitals.
“Filipinos should not have to leave their home province just to receive specialized or critical medical care. We want to bring these essential services closer to where people live,” Suma pa ni Libanan.
Sila si representatives Christopher Sheen Gonzales sa Eastern Samar, Albert Garcia sa Bataan, Maria Angela Garcia (Bataan), ug Jernie Jett Nisay (Pusong Pinoy) maoy mga co-authors sa bill.
Ubos sa maong balaudnon, ang matag probinsiya kinahanglan adunay usa ka DOH hospital licensed nga dili moubos sa Level 2.
Ang Level 2 hospital naghatag og mas lapad nga medical ug surgical services, apil ang general medicine, pediatrics, obstetrics and gynecology, surgery, ug anesthesia, nga gisuportahan og laboratory, radiology, pharmacy, ug ubang importante nga serbisyo.
Gipasabot ni Libanan nga ang bill maghatag sa mga probinsiya og igo nga access ngadto sa government-funded tertiary health services samtang naa usab ang mga existing local government hospitals. — PR/MEL (BANAT NEWS)
- Latest



















