Paghuman sa CCMC, malangay nasad
Posibleng malangan nasad ang target paghuman sa bag-ong Cebu City Medical Center (CCMC) karong Enero 2027 tungod sa kakuwang sa mga dokumento gikan sa mga kanhing kontraktor nga nakaapekto sa pagpadayon sa rehabilitasyon sa Phase V sa proyekto.
Matud ni Kenneth Siasar kinsa chief of staff ni Mayor Nestor Archival ug kinsa administrador sa CCMC, padayon ang kagamhanan sa pagkuha ug pag-review sa mga dokumento may kalabotan sa rehabilitasyon sa ospital gikan sa Phase 1 hangtod sa Phase V tungod kay matud pa nga adunay pipila ka kanhing kontraktor ang walay pormal nga termination order gikan sa mayor.
Gani, wala sa’y pagpamatuod nga adunay completion ug acceptance sa pipila ka mga nahuman nang trabaho sa niaging rehabilitasyon sukad pa niadtong 2013.
Dugang pa ni Siasar nga ang kakuwang sa dokumentasyon mao ang hinungdan nga dili makapadayon ang Dakay Construction kinsa mao karon ang kontraktor sa tambalanan.
Gitahasan ang Dakay Construction sa pagkompleto sa Phase V ug gikinahanglan nilang trabahuon ang mga installation nga gihimo sa miaging mga kontraktor sama sa mechanical, electrical, plumbing ug fire protection systems.
Matud pa ni Siasar nga usa sa pinakadakong kabalaka mao ang electrical system gumikan kay kinahanglan nga ikonektar sa Dakay ang ilang electrical wiring ngadto sa trabaho nga gihimo sa kanhing kontraktor.
Dugang pa ni Siasar nga kinahanglan sab sutaon kung ang mga gipangtaod nga electrical system kaniadto dili substandard para makapadayon kini nga walay bulilyaso kung i-turnover na kini sa kagamhanan.
Aron kini mapadayon, gihangyo sa kagamhanan ang mga kanhing kontraktor nga mosumiter og mga dokumento nga makapamatuod sa ilang mga nahimong installation nga nagsunod sa gikinahanglang standards.
Una nang gitan-aw ni Archival nga mahuman ang CCMC karong Disyembre 2026 ug mahimo kining operasyonal karong Enero 2027 apan tungod sa laing kakulian, hanap pa ang posibilidad nga matuman kini. — /IBM (BANAT NEWS)
- Latest
