Alcover nihangyo sa DENR nga imbestigahon ang EMB-7

CEBU, Philippines — Paimbestigaran ni Konsehal Pastor “Jun” Alcover Jr. sa Department of Environment and Natural Resources (DENR) Central Office ang Environmental Management Bureau sa Central Visayas (EMB)-7 tungod kay wala kini motambong sa executive session diin gituki ang padayon nga operasyon ug rehabilitasyon sa Prime Waste Solutions Inc. (PWS) sa Barangay Binaliw.

Gipahigayon ang executive session niadtong Septiyembre 8, 2026 subay sa SP Resolution 17-0660-2026 aron hisgutan ang resulta sa joint ocular inspection sa landfill ug aron matuki ang basehan paglibkas sa cease-and-desist order aron nga makapadayon ang PWS sa ilang operasyon.

Sa giduso nga resolusyon ni Alcover, gihangyo ni Alcover ang DENR-7 nga susihon kon nganong walay awtorisadong representante sa EMB-7 ang mitambong sa executive session bisan pa og apil ang ahensiya sa opisyal nga imbitasyon ug kinahanglan kini nga motubag sa mga pangutana sa konseho.

Buot sab klarohon ni Alcover kon nadawat ba sa EMB-7 ang imbitasyon ug kung makatarunganon ba nga wala kini motunga ug kung angay bang adunay administratibong aksyon batok sa mga opisyal o kawani nga responsable niini.

Gipasabot ni Alcover nga mahinungdanon ang partisipasyon sa EMB-7 tungod kay aduna kini mandato sa paghatag og teknikal nga regulasyon sama sa pagpasabot sa mga environmental permit, compliance requirements, ug sa legal nga basehan nga nagtugot sa PWS nga makapadayon sa operasyon sa landfill samtang nagpadayon ang rehabilitasyon.

Gawas nga wala kini motambong sa executive session, wala sab kini motambong sa joint ocular inspection niadtong Septiyembre 2 uban sa mga konsehal, sakop sa Office of the Building Official (OBO), Cebu City Disaster Risk Reduction and Management Office (CDRRMO), Cebu City Environment and Natural Resources Office (CCENRO). (BANAT NEWS)