EDITORYAL - Limitahi ang floating cottages

Nabuhian og paglaum ang mga nanginabuhi pinaagi sa gipangtukod nga mga floating cottages diha sa kadagatan sa lungsod sa Cordova.

Ang pagtugot na sa operasyon niini siguradong himuong sumbanan sa uban pang mga local government units nga tugotan sab ang susama niini nga operasyon diha sa ilang kadagatan.

Tinuod makapalagsik kini sa turismo sa maong lungsod, modagsa na usab og balik ang mga dayo gikan sa nagkalain-laing mga lugar nga gustong makasuway anang floating cottages.

Siguradong daghan na sab katumoran ang mga manindahay og mga isda, kinsahon, ug mga pagkaon sa lugar ug ikalipay kini sa mga lokal nga mga residente.

Apan sa pagtugot na unya niini, seryusohon usab unta sa mga opisyales sa maong lungsod ang pagprotihir sa kinaiyahan ilabi na ang kadagatan sa maong lungsod.

Ang kaniadto gikahimutangan sa liboan ka floating cottages sa wala pa kini gipaguba ni Gob. Gwendolyn Garcia, dili kaayo layo sa tradisyonal nga fishing ground sa mga Cordovahanong mananagat.

Dili sab kini layo sa mangrove are sa maong lungsod nga nagsilbing itloganan sa daghang klaseng mga isda.

Sa pagbalik unya sa operasyon sa floating cottages, dili unta niini maapektahan ang panginabuhian sa mga lokal nga mananagat.

Niadtong wala pa badlonga kining mga floating cottages daghang lokal nga mananagat ang nasagmuyo tungod kay ang ilang kaniadto panagatan sa adlawan ug sa gabii, dili na nila maagian tungod sa mga nagkutay-kutay nga mga pisi sa pundo niining mga estraktura nga makasabod sa ilang pukot ug pasol.

Dili unta mahitabo nga mamatay ang panginabuhian sa mga gagmay nga mananagat tungod kay gipaboran kining mga kwartahan nga makapahimo og mga floating cottages.

 Limitahan sab ang gidaghanon sa floating cottages, siguraduhong duna silay septic tanks, saktong basurahan ug kalabayan niini diha sa mala aron dili mahugaw ang dagat.

Siguraduhon ang safety, dunay accredit ug trained nga lifeguards, floating devices ang matag cottage, ug dunay lokal nga magbalantay gikan sa munisipyo alang sa seguridad ug kaluwasan sa mga bisita.