Nagkinahanglan pa og smart thinking

Gihagit sa mga consumer ug civil society groups sama sa CitizenWatch ug uban pa, ang mga business organization nga pamatud-an nila ang ilang mga pasidaan nga ang padayon nga panagbangi sa Pilipinas ug China makaapekto sa minilyon nga trabaho alang sa mga Filipino. Morag daghan ang dili mouyon ni’ng baruganan sa mga civil society groups. Unsaon nato pagpakigkompetensya sa China nga ang economic plan sa atong gobyerno mao man lang ang pagpakita sa television nga magul-anon ang atong mga lider.  Matud pa sa akong palahubog nga amigo, “Sa China, aduna sila’y mga smart homes, dinhi sa ato, aduna kita’y mga pinuy-anan nga nagkinahanglan pa og smart thinking aron lang mo-agas ang tubig sa atong gripo.”  Fezteleern!

Wala makaapil pagsakiyo

Gikataho nga midemiter sa iyang katungdanan si Presidente Santiago Peña sa Paraguay tungod sa usa ka banking scandal diin naglisod ang hapit katunga sa populasyon sa nasud sa pag-access sa ilang tinigom sa banko.  Aduna pa gyu’y culture of shame ug delicadeza ang mga lider sa ubang nasud.  Dili parehas dinhi sa ato nga bisan tataw na ang ebidensya sa kasaypanan, magpa-aron pa nga inosente.  Kay ginaingon man lage nga, “Dinhi sa Pilipinas, dakong sayop ang kurapsyon kon ang nanaway nga politiko wala makaapil sa pagsakiyo.”  Madahaan!

Kawaton bisan nagbaga

Gisiko sa kapolisan ang kanhi Miss Thailand nga si Panadda “Boom” Wongphugee tungod sa alegasyon nga gigamit niya ang mga donasyon ngadto sa iyang gitukod nga “Do Good Foundation” sa iyang personal nga luho’ng lifestyle.  Dili maka-ipsot ang mga pagpanlimbong didto sa laing nasud.  Apan dinhi sa ato, daghan ang susamang panghitabo diin ang nakasakiyo sa pundo mao pa ang mokiha sa nakasakop kanila.  Bisan gani ang kapunongan sa simbahan, wala maka-lingkawas ni’ng maong modus.  Mao kana’y giingon nga, “Kawaton man gani dinhi ang puthaw bisan nagbaga, kwarta pa kaha?” Muleeng!

Katalagman ug pagdinanghag

Mihukom ang Korte Suprema nga ang pagbilanggo sa ginikanan tungod lamang sa pagpalta kay dili niya makaya ang paghatag sa financial support, mas makadaut hinoon sa kahimtang sa mga anak.  Nasuta sa korte nga walay intensyon nga molikay ang amahan sa iyang katungdanan kon dili, nakasinati lang ang naulahi sa kalisod sa pagtuman niini sa hingpit tungod sa kakulian.  Haum ni’ng hukom sa Korte Suprema ang panahom nga, “Dakong katalagman kon mawala ang usa ka ginikanan; apan usa na ka pagdinanghag kon ang duha na ka ginikanan ang mawala.”  Atala lagee!

Mas maayo ang apo

Matud pa ni Francisco Dizon, vice president ug trustee sa Laura Vicuña Foundation, nagkinahanglan og giya ang mga kabataan kon unsaon pag-gamit ang mobile phones ug social media.  Wala kaha masayop si Dizon sa iyang obserbasyon? Kinahanglan tingale usab nga iyang klarohon kon unsang hut-ong sa kabataan ang nagkinahanglan og giya.  Kay matud pa sa akong silingan, “Unsay giyahan nga mas maayo pa man kay kanako “mokulkog” sa celphone ang akong 4 anyos nga apo.”  Pagkatoytoy!