EDITORYAL - Dakong papel sa Amerika

Karong sunod semana, makaginhawa og gamay ang mga motorista kay dunay bigtime oil price rollback nga mahitabo.

Tungod ni sa paglurang sa kabalaka sa mga negosyante sa industriya sa lana human nga napildi ang partidong Republicans ni US President Donal Trump. Tungod ana, mayoriya karon sa Kongreso, gikan sa Senado hangtud sa Lower House sa Amerika, kontrolado na sa Democrats.

Ang Democrats dili gyud gusto sa mga polisiya ni Trump ilabi na sa giyerang iyahang gisugdan sa Middle East batok sa Iran. Dili na karon makabuot-buot o makapamugos sa Trump sa kung unsay iyang gustong buhaton kay kanunay man siyang suportahan sa US Congress sa una.

Ang kapildihan sa Republicans ilabi na sa mga dagkong estado nga solidong Republicans nagpakita nga bisan ang mga botanteng Amerikano ug panatiko ni Trump, gipangpul-an ug nitiyabaw na sa kamahal sa tanang palaliton tungod sa krisis sa lana.

Tungod sa maong kausaban, nikalma ang tensiyon sa Middle East ug nibalik ang biyahe sa mga oil tankers ug commercial vessels sa Persian Gulf ilabi na sa Strati of Hormuz nga diin kinahanglang labangon sa mga barko, apan kontrolado sa Iran.

Kapunitan kini og pagtulon-an sa tanan, ilabi na sa mga anti-Americans. Bisan unsaon pa nila og kasuko o bash sa Amerika, dawaton man o dili, dako ang ilang papel sa kalibotanong ekonomiya ug sa kinatibuk-ang kahimtang sa tanan.

Kun mokamang ang US, siguradong nalubong na sa yuta ang ubang mga nasud.

Ang pagkalma palang sa tensiyon nakapabalik sa gahum sa Piso kontra dolyar nga niabot og P65 ug karong bag-o naabot nalang og P62.

Lisud para sa Pilipinas nga ubos ang balor sa Piso niini tungod kay dolyares man ang gigamit sa world market.

Ang mga negosyanteng Pilipino magkinahanglan og dakong puhonan matag mangompra kini sa laing nasud, apil ana ang petrolyo.

Tungod sab aning kausaban sa US, duna kini epekto sa kalibotanong sitwasyon apil ana ang giyera sa Ukraine ug Russia, Middle East ug bisan dinhi sa Asya Pasipiko nga tensyonado sab tungod sa paghawud-hawod sa China.