Pangilad sa budget
Sa ilang pakigtagbo sa batan-on nga mga sakop sa People’s Budget Coalition (PBC) ug ubang mga grupo, giluwatan nilang House Speaker Bojie Dy ug ubang mga kongresista ang mga pulong nga gustong madunggan sa publiko:
Nangayo sila og pasaylo sa pag-isnab sa mga imbitasyon sa PBC sa niaging duha ka tuig aron unta pagtuki sa budget process;
Nangayo sila og pasaylo sa pagtawag nga ignorante sa mga nanaway sa House version sa 2027 budget; ug
Nisaad sila nga ablihan ang tanang mga dokumento sa ilang budget deliberations ngadto sa publiko.
* * *
Maayo na lang nga wala magpadala sa ulog-ulog ang mga batan-on. Kinsa naleksiyon na sa lipat-lipat. Giluwatan sa mga kongresista ug mga senador ang samang pasalig pagtarung sa budget sa nangaging katuigan. Pero nahitabo ang P1.7 trilyones nga flood control scandal.
Sama sa mga batan-on, padayon natong bantayan ang mga kongresista. Ug bisan ang mga senador nga nipasalig pagbabag sa tanang pork barrel sa 2027 budget.
* * *
Dili monopoliya sa Kongreso ang abundang mga pasalig. Nagbalikbalik sab og saad si Presidente Ferdinand Marcos Jr. sa pag-veto sa tanang kuwestiyonable nga mga probisyon sa 2025 budget tungod sa kusganong mga pagsaway sa nagpakabana nga mga sektor.
Pero pila ra ka bilyon ka pesos nga pork barrel ang iyang gitangtang. Giaprobahan gihapon sa presidente ang kinadak-an nga mga palusot. Ang resulta? Gihulagway ang 2025 budget nga mao ang labing kurakot sa kasaysayan. Ug sama sa 2024 budget ug sa kabahin sa 2026 budget, gideklarar sa Korte Suprema nga unconstitutional.
* * *
Dili kakumpiyansahan ang pagpasabot nilang Dy ug kaubanan: Dili na lang bakwion ang House version sa budget, bisan sa nabisto nga kapin sa trilyon ka pesos nga pork ug P190 bilyones nga insertions nga walay mga dokumento, kay makurhian ra ang tanan sa bicameral conference committee.
Kay nahalin na sab ning linyaha sa nangaging katuigan. Inig abot sa bicam, modayon sila og ingon nga wala na diay igong panahon sa pagsubli ug pag-usab sa tanang depektusong mga probisyon. Pakapinan dayon sa hulga: Mas makadaot sa nasud kon walay bag-ong budget nga mapasar ang Kongreso, aron nga kapirmahan sa presidente sa dili pa matapos ang Disyembre.
* * *
- Latest
