3,000 ka kawani sa City Hall mawagtangan og trabaho

CEBU, Philippines —  Nikabat ngadto sa 3,000 ka trabahante sa Cebu City Hall ang mawagtangan sa trabaho nunot sa ipatuman nga right sizing sa local government unit.

Inanay ang pagpatuman niini hangtud sa tuig 2025 diin maoy tinguha sa Cebu City LGU nga kadtong mga anaa sa plantilla position lang ang magpabilin sa serbisyo.

Si Mayor Michael Rama maoy nipahibalo nga adunay 3,000 ka kawani sa Cebu City Hall ang dili na ma-renew ang appointment sa trabaho diin ang maapektohan kadtong mga job order ug mga casual nga mga empleyado.

Gipasabot sa mayor nga kabahin kini sa right sizing nga gipatuman sa iyang administrasyon subay usab sa lagda sa gobiyerno.

Nipatuman usab og mga innovation ang Cebu City Government sa ilang serbisyo ngadto sa katawhan lakip na ang online services, paperless transactions ug uban pa nga dili na magkinahanglan og manpower.

Ang pagpatuman sa non-renewal of appointment inanay hangtud sa tuig 2025 diin sa kasamtangan adunay kapin sa 9,000 ka trabahante sa Cebu City Hall nga gilangkuban sa 1,400 ka regular; 200 ka co-terminus; 3,300 ka casual ug nikabat ngadto sa 4,000 ka job order.

Ang City Hall adunay kapin sa 3,000 ka plantilla position ug target nila nga mabutangan og deserving nga kawani.