Ordinansa gipasar alang sa green infrastructure

CEBU, Philippines — Nipasar ang Cebu City Council og ordinansa nga nag-require sa desinyo ug konstruksyon sa mga building ug ubang istraktura nga kab-oton ang minimum standards alang  sa green infrastructure.

Usa kini sa pamaagi sa pagsuporta sa kampanya sa gobyerno sa pakigbatok sa climate change.

Sila si Konsehal Nestor Archival, Sr.  ug Konsehal Jerry Guardo maoy nigama niini nga nag-ulohan og “Green Building Ordinance of the City of Cebu”.

Sa maong pamaagi, mogamit og mga teknolohiya ang matag building kun diin mapakgang ang polusyon.

“To support government’s efforts to fight climate change, there is a need to institutionalize eco-friendly systems and technologies that reduces greenhouse gases and other hazardous emissions from buildings and other structures,” tipik sa statement sa maong ordinansa.

Matud pa sa duha ka konsehal nga makatabang usab kini sa paghatag og limpyo nga palibot alang sa mga tawo nga mosulod sa building.

Maghatag usab kini og incentives alang sa mga nituman niini ilabi na kadtong nigamit gyud og environment-friendly nga materyales ingon man usab ang pagpatuman niini og renewable energy.

Gikampanya usab niini ang pagamit og solar energy ingon man usab ang pagtigom og tubig sa ulan, sa maong pamaagi, maminosan usab ang aktibidades sa pagamit sa elektrisidad busa kinahanglan nga matag building mo-establisar og Comprehensive Energy Management Plan.

 Ang pagprotektar sa kalikopan ug pag-angkon og hamugaway og limpyo nga lugar maoy nag-unang tumong sa maong ordinansa. —MEL (BANATNEWS)