Contingent sa SoKor moabot sa Enero
CEBU, Philippines – Kompirmado na nga apil sa kalihukan sa Sinulog 2019 ang Wonju Dynamic Dancing Carnival sa South Korea kini maoy gipahibawo ni Konsehal Dave Tumulak.
Si Tumulak kinsa executive committee chairman sa Sinulog 2019 nagkanayon nga na-finalize na nila ang schedule sa maong grupo ug nahan-ay na usab nila ang hotel accommodation, pagkaon ug transportasyon niini.
Ang grupo gikatakdang moabot sa alas 2:00 sa kadlawon sa Enero 19, 2019 diin atol kini sa adlaw sa pagpahigayon sa solemn procession subay na sa kapistahan ni Senior Santo Niño.
Sa gabii sa samang adlaw ang grupo gikatakdang mopasundayag diha sa Fuente Osmeña Rotunda nga libre sa publiko. Atol sa Sinulog Grand Parade ang Wonju moapil sa street dancing ug mo-perform usab sila sa entablado sulod sa Cebu City Sports Center.
Human sa ilang presentasyon diha sa CCSC sa gabii mo-perform na usab sila diha sa Plaza Independencia nga libre gihapon.
Si Tumulak niawhag sa fans ug manan-away sa Sinulog nga dili mag-selfie sa mga performer aron dili maputol pagpasundayag sa grupo.
Sa Enero 21, 2019 gikatakdang molarga balik ngadto sa South Korea ang Wonju Dynamic Dancing Carnival. Nasayran nga ang grupo maoy niabaga sa ilang pamasahe sa eroplano paingon dinhi sa Sugbo ingon man pabalik sa ilang nasud. (/BDB)(BANAT NEWS)
- Latest
