Cash aid sa mga solo parents ipanghatag na sa siyudad sa Mandaue

CEBU, Philippines —  Mokabat sa 1,757 ka qualified solo parents sa Mandaue City ang gilauman nga makadawat og P12,000 matag usa kada tuig isip pinansyal nga tabang gikan sa city government.

Posibleng ma-release na sa sunod semana ang ikaduhang hugna sa maong pinansyal nga ayuda, sumala sa City Social Welfare Services Office (CSWSO).

Gihisgutan ang paghatag sa ayuda atol sa tigum nila ni Mayor Thadeo “Jonkie” Ouano, CSWSO head Dr. Michael Pielago ug Federation of Solo Parents Mandaue City Chapter focal person Pureza Tabuac niadtong Huwebes, Septiyembre 10.

Ang maong programa kabahin sa mga serbisyo sa lokal nga kagamhanan alang sa mga solo parent sa siyudad.

Gawas sa pinansyal nga tabang, gihisgutan usab ang panginahanglan nga mas hugot nga ipatuman ang anti-mendicancy program sa Mandaue.

Matud ni Tabuac, namatikdan nila nga nagkadaghan na usab ang mga tawo nga mangayo og limos o maglibot-libot sa nagkadaiyang lugar sa siyudad.

Bisan pa sa mga lakang ug programa sa lokal nga kagamhanan batok sa mendicancy, nagpadayon gihapon ang problema tungod sa pagbalik-balik sa mga mendicant sa dakbayan.

Miingon si Ouano nga iyang hisgutan uban sa City Council ang anti-mendicancy program aron mapangitaan og paagi nga mas mapalig-on ug mahimong mas epektibo ang pagpatuman niini.

Mitambong usab sa maong tigum sila si City Administrator Atty. Gonzalo “Sally” Malig-on Jr. ug Executive Secretary Atty. Riczen Gingoyon. (BANAT NEWS)