56 ka balay nasunog
CEBU, Philippines — Mokabat sa 47 ka panimalay ang hingpit nga naugdaw samtang siyam pa ang partially damaged human miulbo ang sunog sa Sitio Isla Verde, Barangay San Isidro, Talisay City, Cebu, niadtong Sabado sa buntag, Septiyembre 12.
Matud ni Fire Officer 2 Mar Dee II A. Auxtero, fire/arson investigator, ang 47 ka balay nga hingpit nga naugdaw naglangkob sa 38 ka owned structures ug siyam ka shared structures.
Sa siyam ka partially damaged, walo niini ang owned structures samtang usa ang shared structure.
Sa kinatibuk-an, 58 ka pamilya nga gilangkuban sa 210 ka indibidwal ang naapektuhan sa sunog.
Mikabat sa gibanabanang 900 square meters ang naapektuhang lugar ug gibana-bana nga P1.35 milyon ang kantidad sa kadaot sa mga kabtangan.
Gitaho ang sunog alas-8:16 sa buntag ug miabot ang mga bombero tulo ka minuto human madawat ang report.
Gipataas ang response ngadto sa first alarm alas-8:20, gisundan sa second alarm alas-8:28 ug third alarm alas-8:34 samtang gipaningkamotan nga mapugngan ang pagkaylap sa kalayo.
Nakontrolar ang sunog alas-9:02 sa buntag ug gideklarar nga hingpit nang napalong alas-9:07.
Naay usa nga naangol sa insidente, nga giila nga 41-anyos nga si Joy Ispacio, human nakaangkon og minor abrasion ug natambalan sab dayun human sa insidente. Wala’y namatay samtang padayon pa ang imbestigasyon sa hinungdan sa sunog.(BANAT NEWS)
- Latest
